Shillong, Nailar 27: Halor ka kaiphot kaba la ioh na ka ICAR- National Institute of High Security Animal Diseases (NIHSAD), Bhopal bala pynthina ba ka don ka jingsaphriang ka khlam ha ki sniang ia kaba la tip kum ka “African Swine Flu” ha Meghalaya ka tnad ri jingri jong ka sorkar pdeng New Delhi katkum ka shithi kaba la phah ha ka 24th Nailar 2020 bad halor ka kaiphot kaba la ioh na ka North Eastern Regional Disease Diagnostic Laboratory (NERDDL) Guwahati.
Ban iada ia kane ka jingsaphriang kane ka khlam “African Swine Flu” ha kane ka jylla, katkum ka bor kaba la pynkup hapoh ki kyndon 6 bad 20 jong ka ain “Prevention and Control of Infectious and Contagious Diseases in Animals Act, 2009” na ka liang jong u lat ka jylla u la pynbna ba ki 19 tylli ki shnong kum ki jaka kiba don ia kane ka khlam “African Swine Flu”.
Ki shnong ki long, Ka shnong Lamin, Shangpung, Shnongpdeng, Nongtalang, Khlieh Umtrew, Umnget, Mawlyngkhung, Umsaitsning Umdamli, NOngrim Nongladew, Umkdait, Nongmynsong, Mawlai Mawdatbaki, Mawshbuit Nongrim, Mawshabuit Nongkhlaw, Sohlwai, Krang, Mylliem Madaningsyiem, Lumbangla, 5th Mile, Parmaw, Upper Shillong, Synrang Shakhain,Rymbai, Wapungskur, Government Pig Farm Mairang.
Katkum ka jingbthah na ka “National Action Plan” ban iada na ka jingsaphriang bad ban pynduh pyndam ia kane ka jingpang ki shniang ka “African Swine Flu” kumba la pynkhreh da ka tnad ri jingri jong ka sorkar pdeng, la mana ba ha kitei ki shnong kiba la pynbna shi kilometre sawdong la niew kum ka jaka ba shah ktah ka “Infected Zone” bad ia ki shnong kiba don 10 km sadang na ka shnong ba la niew kum ka jaka ba shah ktah yn niew ia ki kum ki shnong ba hap ban peitngor ia kaba la tip kum ka “Surveillance Zone”.
Ha kine ki shnong kiba la niew ba don ka jingktah kane ka khlam sniang, ka khang ban rah ia ki sniang im, ka doh ne ki jingbam sniang sha kitei ki shnong, kam dei ruh ban don kano kano ka jingrah ia ki jingbam ne ki dawai kiba ia dei bad ki sniang. Ia ki tiar kiba pyndon kam ha kaba ai bam ia ki sniang ym dei ban rah na sem sniang.
Ki trai jong ki sem sniang ki dei ban pynkhuid bad ym dei ban shah ia ki briew ba kin rung ha kine ki sem sniang, haba ia dei bad ka leit ka wan jong ki briew pat ym dei ban khang. Katba ia ki sniang ymd ei ban rah na kawei ka sem sha kawei pat bad kiwei kiwei ki kyndon kiba la buh. Haba ia dei bad ki sniang kiba iap dei ban shutep da kaba tih jylliew ia ka thliew bad dei ban bet shun shwa ban tap khyndew bad ban but ryntih ia ki jingbthah.
Katba ha ki shnong kiba hap hapoh ka jingpeitngor, la khang ban rah ia ki sniang na ki shnong ba hap ha ka jingpeitngor sha ki shnong kiba la shah ktah. Katba ia ki sniang lah ban rah na kawei ka sem sha kawei pat tang ha kito ki shnong kiba don hapoh ka jingpeit bniah. Ia ki tiar ba ai jingbam ia ki sniang kiba na ki shnong ba la shah ktah ha kane ka khlam ym dei ban sha sha ki shnong kiba hap hapoh ka jingpeitngor bad dei ban but ruh ia ki jingbthah.
Ha ka juh ka por kum ki lat jingiada ki nongri sniang ki dei ban pynkhuid ia jaka ri sniang, ym dei ban pynpoi ia ki kali sha jan ka sem ri sniang, ia ka doh sniang lane ki jingbam sniang ym dei ban pynpoi na ki jaka ba shah ktah ha ka khlam sniang sha ki shnong ba hap hapoh ka jingpeit bniah. Ki briew kiba dei ki ASF ki dei ban peit bad ban pynthikna ba ki shnong ki dei ban leit na kane ka khlam jingpang sniang.
