Shillong, Jymmang 02: Ka Skul St. Paul UP School, Jatah Lakadong ha ka 28th April 2017 kala pynhap pyrda noh ia ka Inter house School Meet 2017 ha ka jingialang kaba iphuh iphieng ha kaba la wan ban sakhi lang naduh ki kmie ki kpa jong ki khynnah skul kynthup ruh ia ki paidbah nong shong shnong ha ryngkat ki nong shah khot sngewbha.
Ha katei ka sports meet ia kaba la pynlong baroh shitaiew kynthih lyngba ki jait jing ialehkai kiba pher bapher kynthup ia ka jingialehkai Kho Kho, High Jump, Long Jump, Short Put, Marathon lem bad kiwei kiwei de kum shibynta ban sei ia ki riew donsap bad ha kajuh ka por ban pyn thanda shipor ia ki jingmut jing pyrkhat ia ki khynnah skul bad ha kajuh ka por ruh kalong ban pyntikna ba ki khynnah skul kin ioh ia ka met kaba koit ba khlain kaba long ka bynta kaba kongsan tam ha ka jingim.
Ha katei ka sngi la sam ruh ia ki khusnam sha baroh ki nongjop ha ki jingialehkai kiba pher bapher da u Kongsan u bah Banteidor Lyngdoh (Bah Pai) uba long ruh u MDC jong ka Mawkynrew jong ka Constituency.
Haba kren kum u Kongsan ha katei ka sngi na ka liang jong u Bah Banteidor Lyngdoh (Bah Pai), u la ai jingiaroh shikatdei eh ia kane ka sienjam ba la shim da ka Skul St. Paul UP School, Jatah Lakadong ban pynlong ia kum kine ki Sports Meet da ka mynsiem jong ka jingkitkhlieh bad ka jing iohi jngai ban saindur ia ka lawei kaba phyrnai jong ki khynnah skul da kaba bynrap ruh ba kum ka pateng bynriew kaba mynta ngi im ha ka juk jong kiba bun ki jingkylla.
kumta da ka mynsiem kaba sngew kmen eh u la ong ba dei lyngba kum kine ki jait Programme kiba long ki Extracurricular Activities jong ka Skul yn lah ban sei ia ki riew donsap bad ban kyntiew iaki shajrong bad kham shajrong tad haduh ba kin da lah ban long ki khlur kiban tyngshain ym tang ha ka shnong hynrei ha ka jylla bad ha ka ri hi baroh kawei hynrei u la ong pat ba ka Sap khlem ka Kyrdan pule kan shu long lehnohei, ha kaba u la kyntu ia ki khynnah skul ba ki dei ruh ban pynlut por ha ka pule puthi khnang ba kin lah ban pyntikna ia ka lawei kaba phyrnai.
Kiwei pat ki kynrem ki lyndan kiba ia don ryngkat ha katei ka sngi ki kynthup ia u Bah R. Nongrum Sordar Shnong Jatah Lakadong, Sister Elmolin Lyngkhoi jong ka Holy Cross , Head Teacher jong ka UP & Head Master Secondary St. Paul School, Jatah Lakadong School bad ki wei de ki Nonghikai nalor jong mkiwei pat ki Nong shah khot sngewbha.
