Shillong, Naitung 23: ka Rotary Club Shillong kala pynioh ia ka umdih kaba khuid ia ki khynnah skul jong ka Mawkhar Christian Higher Secondary School, Shillong ia kaba la plie mynta ka sngi da u bah Adelbert Nongrum MLA.
Ka jingbei pisa na ka bynta ban pynioh ia kane ka Umdih sha kane ka skul la bei da u Shankarlal Gienka lyngba ka Rotary Club Shillong ha ka jinglut kaba la kot sha ka T.91,000 /- tyngka.
Ha ka jingkren jong u Bah Adelbert Nongrum MLA jong kane jaka u la ong ba ki samla ki dei ka lawei jong ka ri bad da ka jingioh ia ka um kaba khuid kin ioh ia ka met kaba koit kaba khiah bad ki lah ban leh bha ha ka jingpule jong ki.
Na ka liang jong u President jong ka skul ha ka jingkren u la ong ba ka Ri India ka dei kaba iar haduh katta katta bad kaba don bun jaid ki jaidbynriew bad kane kala pynlong ia ka jingia jan para briew ban pynlong ia ka Ri India kaba khlain.
