Shillong, Rymphang 04: Ka seng Hynniewtrep Youths’ Council (HYC) kat nang wan ki sngi bad ki snem kala dang pyniar ia ka shnat trei kam jong ka ha kaba ha ka 3 tarik u Rymphang mynta u snem ka Seng ka lah ioh ban thaw sa ia kawei ka Shnat treikam kaba thymmai hapoh Ri War Shella ia kaba lah tip kum ka HYC – Jatap Unit kaba don hapoh u Sandi Mustoh, Shella Confederacy.
Ha kane ka sngi ki Nongialam ka Sengkmie ki lah ioh ban pyntiansmai bad pynskhem ia ki Nongkitkam kane ka Unit ha ka jingsakhi lang ki Riew Rangbah bad ki paidbah Nongshongshnong.
Ia ka bynta ba Kongsan ban pyntiansmai lah shim da u Nongialam ba Rangbah duh ka Seng u Samla Rangbah Roy Kupar Synrem, President HYC-CEC ha ka jingiadonlang kiwei pat ki Nongialam ka Seng Kmie kiba kynthup ia u Francis G. Mawlong, Vice President, HYC-CEC; Isaac Basaiawmoit, Secretary, HYC-CEC bad kiwei kiwei ki dkhot ka Central Executive Council.
Ia ka Jingialang lah pyniaid da u Samla Rangbah John Lyngdoh, Chief Organising Secretary ka CEC bad lah ioh ka jingduwai ha shuwa ban sdang ka Jingialang na u Rangbah Clever Tham bad ki Jingkren na u Samla Rangbah Francis G. Mawlong bad u Rangbah D. Dkhar, Chairman Dorbar Kher Jatap.
Ki Nongialam bad dkhot ka HYC- Jatap Unit ki kynthup ia u President- Pyndapbor Shongwan; Ki Vice President- Teibor Diengdoh bad Bankyrshan Nadon; U General Secretary- Pyndaplang Laitmon; Ki Secretary- Khrawkupar Laitmon bad Bakordor Rapmai; Sports Secretary- Starwell Phin bad 20 ngut ki Executive Members.
Ha kane ka sngi na ka liang ka Seng ka lah ioh ruh ban sam ia ki jingai sngewbha da ki Nep Syaid bad ki Tap moh khlieh ia ki Nongshongshnong ka Kher Jatap bad Lum-u-Smon.
