Shillong, Jylliew 25: Ka seng National People’s Party (NPP) Shillong City ha ka sngi Balang ka la ioh ban pynkup burom bad ai kh
ublei ia u State President ka NPP Meghalaya u Dr WR Kharlukhi halor ka jingjop don burom ka jong u ia ka ilekshon MP sha ka iingdorbar Rajya Sabha kaba la long ha ka 19 tarik mynta u bnai.
Ka NPP Shillong City ka ai khublei ruh ia u Myntri Rangbah ka jylla u Conrad K Sangma uba dei ruh u National President ka seng, ki MLA ka NPP bad kumjuh ruh ia ki MLA jong ki seng sain pyrthei bapher bapher bad ki MLA shimet kiba iasynrop lang hapoh ka sorkar Meghalaya Democratic Alliance (MDA) kiba la ai ka jingkyrshan kaba pura ia u Dr W Kharlukhi na ka bynta ban pynioh ia ka jingjop kaba don burom.
Na ka liang ka Shillong City ka ai ka jingkitbok kitrwiang ia u Dr Kharlukhi ba un nangkiew shaphrang bad khamtam ruh na ka bynta ban peit ia ka eh ka shon bad ka bit ka biang jong ka jylla bad ia ka ri bad ka jaidbynriew hi baroh kawei.
Kum ka dak ka jingpynkup burom bad ai khublei, ka Shillong City hapoh ka jingialam u Bah Anthony N Nongbri, Working President bad u Bah Arnold M Lanong, General Secretary ki la ioh ban ai ia u syntiew, ka jingpynkup ka jain ryndia bad ka memento.
Ha kane ka sngi, la iadon lang ryngkat ki nongialam bad dkhot ka Shillong City bad kumjuh ruh na ki block bapher bapher ba hapoh ka Shillong City na ka bynta ban pynshit bad pynshngain ia kane ka jingpynkup burom kaba rit.
U Dr WR Kharlukhi ha ka jingkren kaba lyngkot u la ai khublei bad pynpaw ia ka jingsngewnguh ia ka NPP Shillong City kaba la shim ia kane ka bynta ban pynkup burom ia u. U la ong ruh ba u la don ka jingpyrkhat nangne shakhmat da la kham thanda kane ka jinglong jingman namar ka khlam COVID-19.
U Dr W Kharlukhi u la ong ba yn sa khot ban iakynduh ia ki dkhot ka Shillong City na ka bynta ban iatai ia ki jingeh khamtam kumno ban pynkhlain ia ka party bad ruh ban iakren ha kaba iadei bad ki kam ban kyntiew ia ki shnong ki thaw.
