Shillong, Jylliew 13: Ka OM Roy Memorial Higher Secondary School ka la pynkup burom ia ki khynnah kiba la pass ia ka SSLC kiba don 71 ngut bad 20 ngut kiba la pass ha ka HSSLC, ha ka sngi Thohdieng.
Napdeng ki la pass ha ka HSSLC, ki don katto katne ngut ki dei ki longkmie bad kiba la rangbah ha ka rta kiba la pass.
Ha kane ka sngi pynkup burom la iadon lang u MLA ka Mawlai Constituency, Bah Embhahlang Syiemlieh ha ryngkat ka jingiadon lang ka Principal, Kong A. Syiemlieh, ki dkhot ka Managing Committee, ki nonghikai bad ki khynnah skul.
Haba kren ha kane ka sngi, u Bah Embhah u la pynpaw ia ka jingkmen ba kane ka skul ka la lah ban sei ia ki khynnah kiba pass ha ka eksamin SSLC bad HSSLC. “Kane ka long ka sien kaba nyngkong ba ngan iohi ia ki longkmie kiba la pass ia ka eksamin HSSLC ha ka rta kaba la heh ha ka rta. Kane ka pyni ba ka jingheh ha ka rta kam lah ban khanglad ia kito kiba don ia ka jingengnud ban kynjoh sha ki kyrdan kiba kham shajrong,” u la bynrap.
“Kum ki khynnah ki dei ban long kiba trei shitom, kampher watla ki sah klas, hynrei ha kawei ka sngi phin sa ioh kheit ia u soh ka jingjop,” la pynshlur u Bah Syiemlieh ia ki khynnah.(SP News)
