Shillong, Iaiong 20: 
U Lat ka jylla u Banwarilal Purohit ha ka mynta sngi u la pynkup burom ia u Oinam Doren hapoh Raj Bhavan shillong u ba la shna bad pynmih ia ka phi kaba kyrteng “My name is Eeoow”.
Kane ka ei ka Khasi documentary phlim ia kaba la thoh ruh ha ka ktien phareng, la pyni ruh ha kane ka sngi ha iing jong u Lat ha kaba la don long u Principal Secretary jong u Lat ka jylla u K. N. Kumar, u Phadar John D. Jayakumar, u Bah B. S. Rumnong bad palat ia ka 200 ngut ki briew na ka shnong Kongthong bad ki ba najan.
Ia kane ka phlim la ring hapoh jong ka shnong Kongthong hapoh jong ka East Khasi Hills District ia kaba la pynbit pynbiang da u Oinam Doren bad la pynmih ia ka da ka Centre for Cultural Resources and Training, New Delhi. Ia ka jingiathuh khana sha phang kane ka phlim la thoh lang da u Bah Wanphrang Diengdoh bad ka kong Baia Marbaniang kiba la iarap ia u Director .
Kane ka phlim baroh kawei ka long halor ka jinglong kyrpang jong ki paidbah nongshong shnong jong ka shnong Khongthong ia kaba la ia but da baroh ia ka “jingrwai iawbei” kaba la long kum ka sur jingtrei ban pynpaw ia la ka jingieit kmie ia I khun ba dang kha.
