Shillong, Jymmang 19:Ka Khasi Students’ Union Laban Circle ryngkat bad ka Upper Shillong Circle ka pynrem jur halor ka jingshahshoh, shah lute jong ar ngut ki khynnah Khasi, u Manbha Kupar Kshiar bad Wanri Kordor Khyriem kiba na Lummawbah ha ka 17 Tarik u Jymmang, 2017 ha Umshyrpi hajan Military Hospital. Kine ki samla kiba shah shoh shah lute bad la thmu ruh ban pyniap ia ki da ki briew kiba iadon ha ka kynhun kumba 15 ngut eiei.
Hynrei donbok ba wan lap noh da ki briew kiba iaid lynti bad kine ki runar ki ia phet noh bad la ioh ban kem ia uwei ba don kti lang bad ki bad aiti ia u ha kti ki pulit. Hynrei kaba sngewsih ka long ba ki pulit ki pyllait noh ia u da kaba ong ba u dang dei hapoh ka 18 snem rta khlem kano kano ka sakhi ne ka jingtohkit.
Halor kane, ki dkhot jong ka Laban Circle bad ka Upper Shillong Circle kila leit iakynduh ia u Officer-in-Charge jong ka Rilbong Beat House ba kin tohkit bniah ia uta u khynnah bad ban lap ia baroh kiba don kti halor kane ka kam namar kum kine ki jait kam ki ju iai long man ka por sha kum kitei ki thain.
Kumta na ka liang jong ka Laban Circle, la kyrpad ia ki pulit ba kin kem bad tohkit kham bha ia uto u khynnah ba la shah kem ba kin lap ksai ia baroh kiba donkti halor kane ka kam runar bad pynshitom ia ki katkum ka ain. Ioh ba ka long biang kum kito ki por ia um snam ha u snem 1987 ba ka Seng kan hap pyndonkam da ka bor.
