Shillong, Jymmang 19: Ka FKJGP Upper Shillong Circle ka dap da ka jingbitar kaba khraw ia ka jingshah shoh hajan Military Hospital Rilbong. Na ka liang jong ka FKJGP Upper Shillong Circle ka pynrem jur ia kitei ki riew thrang snam kiba la leh ia ki kam runar ban shoh ban dat bad ban lute ia u samla Wanri Kordor Khyriem bad ia u Samla Manbha Kupar Kshiar kiba shong ba sah ha ka Shnong Lummawbah, Upper Shillong katba ki dang wan phai na ka jingbylla jakpoh ban pyndap pynbiang ia ka ing ka sem.
Ka seng ka dap da ka jing lyngngoh kaba khraw ban ioh jingtip na kiba haing ha sem jong u Samla Wanri Kordor Khyriem bad u Samla Manbha Kupar Kshiar ba ki pulit jong ka Cantonment ki la shu pyllait noh ia uwei na ki runar uba donkti ha kane ka jing thombor wat hadien bala iohkem ia u, ka seng ka dawa ia ki Pulit ba ki dei ban kem mardor bad ban ai da ka jing pynsaja kaba tyngeh ia baroh kiba donkti ha katei ka kam pyntriem.
“Lyngba kane ka kyrwoh ngi Kyntu ia kiba haing ha sem jong kitei kiba thombor pyrshah ia u Samla Wanri Kordor Khyriem bad ia u Samla Manbha Kupar Kshiar ba kidei ban shimkhia ban phah iaki ba kin leit pyndem ialade ha ki bor jong ka Ain lada ki kwah ia ka jingbha bad ha kajuh ka por ka seng ka phah ka jingmaham kaba tyngeh ia kiba la pyrshang ban pynjem Rngiew ia ka Jaitbynriew, To Tip ba kane kadei ka Ri jong ngi kumta wat pynbitar iangi ki Trai Ri Trai Muluk namar ba na ka liang jong ka FKJGP Upper Shillong Circle ki long kiba la khreh ban shim da kiwei pat ki sienjam lada ka por ka dawa khnang ban wanrah ka jing shong suk shong shngain ia ki para doh ki para snam hala ka jong ka khyndew ka shyiap kaba u Blei Nongbuh Nongthaw u la ai kyrpang hangi kum ka Jaitbynriew”
Ka FKJGP Upper Shillong Circle mynta ka sngi ka la leit ban synran lang ruh ia kitei ki samla kiba la mynsaw ha katei ka jing shah thombor ban leit shim dawai na Civil Hospital Shillong bad ha kajuh ka por na ka liang jong ka seng ka kitbok kitrwiang ia u samla Wanri Kordor Khyriem bad ia u Samla Manbha Kupar Kshiar ba kin nang ioh ia ka met kaba koit ba khlain bad ba kim dei ban sngew diaw lane sngew tieng ban iaid ban ieng hala ka jong ka Ri namar na ka liang jong ka FKJGP Upper Shillong Circle kin long kiba peitngor bha nangne shakhmat khnang ba kum kine ki jingjia kin ym jia shuh hadien habud. La ong u Bah Kitboklang Nongphlang President ka FKJGP Upper Shillong Circle.
