Shillong, Nailar 16: U Samla pule doctor u Wanteimon Jyrwa 25 snem na Nongstoin, u la duh ei iala ka jong ka jingim ha Arabian Sea ban pynlait im ia ki ar ngut shikpa shiskhun na ka jingshah rong ha ka jingat phyllung jong ka Duriaw ha ka sngi Laitluid jong ka Ri India.
U Director jong ka SOS, Umiam u Anup Singh haba kren ha u SP News Agency u la iathuh, ba u Wanteimon u samla ba la ri la sumar hapoh jong ka SOS Umiam, ha dien ka jingpule ka jong na kane ka jylla, u la ioh ban leit ban pule hapoh jong ka All India Institute Hearing of Speeches ha Mysor jong ka jylla Karnataka.
Ha ka sngi Laitluid jong ka Ri India, ryngkat bad ki para lok jong u kila leit kai sha rud duriaw jong ka Arabian Sea, ha kane ka jingleit kai katba ki dang ia leh kmen, u la ioh ba ar ngut ki nongwan jngohkai pyrthei, u wei u rangbah bad u wei u khynnah kila shah rong noh ha ka jingat phyllung jong ka duriaw.
Haba iohi ia kane ka jing u la leit ban jngi ban tan ia kine ki ar ngut ki briew ia kaba la ngeit ba ki dei shi kpa shikhun, ha dien ba u la ioh ban pynlait im ia kine ki nongwan jngohkai pyrthei, ka jingat phyllung jong ka duriaw kala wan ban rah bad shim noh ia ka jingim jong u samla Wanteimon.
U Wanteimon Jyrwa u dei u khun swet la ri pynheh pynsan ia u hapoh jong ka SOS kaba don ha Umiam bad ha dien ba u la pyndep ia kane ka jingpule Class XII na Shillong u la leit ban pule kyrpang ha kane ka line doctor ha kaba ia dei na ka bynta kiba don jingduna ha ki dkhot met, hynrei kane ka jingjia ba sngewsih kala wan lap ia une u samla.Ia ka met jong u yn sa pynpoi sha Nongstoin ban pyndep ia ka jingleh burom khatduh.
