Shillong, Rymphang 04: Ka seng Hynniewtrep Youths’ Council (HYC) mynta ka sngi kala pynlong ia ka jingiathir jingmut hapoh Mawlai ban ia kren halor ka MUDA building bye-law, bad ka phang jong kane ka jingiakren ka long “ ka rai jong ka KHADC ban ujor sha iing bishar pyrshah ia ka MUDA na ka bynta ka Meghalaya Building Bye-Law ka bha ne ka bakla”.
Kiba la wan ban ia shim bynta ha kane ka jingiamir jingmut ki long u Bah Kynsai M Lyngdoh na ka liang jong ka Mawlai Town Dorbar, u Bah Process T Sawkmie MDC jong kane ka jaka, u Bah Embhah Syiemlieh MLA jong kane ka jaka, u Bah Banshan Khyriem na ka liang jong ka seng samla Mawlai Pyllun bad u Bah PN Syiem CEM jong ka KHADC.
Ia ka jingiathir jingmud la pyniaid da u Bah Robertjune Kharjahrin uba dei u General Secretary jong ka HYC kaba la khot ia kane ka jingiathir jingmut. Kiba la wan ban ia sakhi ia kane ka jingiathier jingmut ka long ruh na ki seng bhalang, kum ka FKJGP bad bun kiwei kiwei ki seng kiba dei na ka Mawlai pyllun.
Ha dien ba la sngap ia jingkren na baroh ki nongialam kiba la wan ban ia shim bynta ka long ba, ka bha lada ka KHADC ka leit ban ujor sha iing bishar bad ha ka juh ka por kala don ruh ka jingpynsngew ba la dei ban dawa na ka sorkar ba ka dei ban pynduh noh ia ka ain Meghalaya Town and Country Planning act, 1989 bad ia ka Meghalaya Town and Country Planning (Amendment) act, 2004.
