Shillong, Lber 31: Ka Lady Keane College kala pynlong ia ka jingleh burom kyrpang ia ki kynthei ha ka 29 tarik mynta u bnai ha kaba bun ki nongdie madan ruh kila ia poi lang ha kane ka sngi rakhe ia ka sngi burom jong ki kynthei ha satlak ka pyrthei.
Ha kane ka sngi bun bah na ki riew kynthei kiba trei ia ki kam die jingdie bad kiwei kiwei ki kam kiba eh na ka bynta ban bsa ia la ka iing ka sem kila ia poi sha kane ka jingleh kmen ban pynsngew ia ka jingeh kaba ki ia kynduh.
Ha kane ka sngi la hikai ia ki riew kynthei ba kumno ban iada ia lade ha ba ki shah thombor, ha kane ka sngi la pynlong ruh ia ka jingiatem ia pud da ka kynhun nongtem jong ki kynthei ban pynphuh ia kane ka sngi, kala don ruh ka jingpyninam ia ki dur, ki jhur bad bun kiwei pat.
La plie ia kane ka jingleh kmen da ka Principal ka Dr C Massar bad ka Chairperson, Women’s Right Commission, kong Theilin Phanbuh. Katto katne ki long kmie kiba dei madan kiba la poi ha kane ka sngi kila pynpaw ia ka jingsngew kmen ka jong ki ban iohi ba ia kane ka jingleh kmen la pynlong na ka bynta ka burom jong ki.
