Shillong Jylliew 04: Ka Mawkhar Sports Club mynta u snem kala rakhe ia ka sngi pynneh mariang 2017 ha ka sngi saitjian da kaba pynlong ia ka jingiamareh ha kaba baroh ki nongwan ia shim bynta kila don haduh 156 ngut kynthei bad shynrang ia kaba la sdang na YMCA, Mawkhar bad pynkut ha ka juh ka jaka.
Ia ki khusnam sha ki nongjop la sam da ka MLA jong kane ka jaka ka kong Roshan Warjri kaba dei ruh ka myntri ha ka koit ka khiah ha kane ka jylla, ha kaba u rangbah shnong u Bah WHD Syngkon lem bad ki kdhot jong ka dorbar shnong kila ia don lang ha kane ka sngi ban ia sakhi lang ia kaei kaba ka sport club ka la leh.
Ki nongjop ha kane ka jingiamareh na ka liang jong ki shynrang ki long, 1st – Synsharlang Wahlang 2nd – Jomsingstar Ramsiej bad 3rd – N.P. Singh, na ka liang jong ki kynthei pat 1st – Pynhun Shullet 2nd – Dateibankynmaw Marwein bad 3rd – Bandasharai Marwein.
Haka liang jong ki khynnah kiba jop ki long, 1st – Joyfullness Kharwanniang, 2nd Batsingstar Kharjahrin bad 3rd – Dasaman Kyndait. Na ka liang jong ki kynthei pat, 1st – Aidaris Lyngkhoi, 2nd – Happiness Phawa bad 3rd – Evamerry Ramsiej.
Kiwei ki nongiashim bynta ia kiba la niew ba ki dei kiba khynnah tam bad kiba la rangbah tam na pdeng ki nongiashim bynta ki long, u Bah khynnah tam na ki shynrang u dei u Banteithymmai Kharjahrin, na ki kynthei ka Baaijingshai Kharjahrin, na ki rangbah ba la rangbah eh dei u Bah Disil Nongrum.
Na ki long kmie kaba la ia shim bynta kaba la rangbah dei ka kong Bandalin Rani. Na ka liang jong ka club kala ai khublei ia baroh kiba la ai ka jingkyrshan ia ka seng ha kane ka jingrakhe ban pynneh ia ka mariang. Ha kane ka sngi kala don ruh ka jingthung dieng ha phylaw jong ki iing briew.