Shillong, Lber 29: La pynlong ia ka regional orientation workshop na ka bynta ki nongthoh khubor jylla ka thain shatei lammihngi halor ki hok jong ki khynnah mynta ka sngi ha Pinewood Hotel, Shillong. Ia kane ka workshop la pynlong da ka National Commission for Protection of Child Rights (NCPCR) ha ka jingiatrei lang bad ka Meghalaya State Commission for Protection of Child Rights (MSCPCR) bad ka Seva Bharati Purbanchal (SBP).
Ki nongthoh khubor jong ki jylla Meghalaya, Sikkim, Manipur, Tripura bad Assam ki la iashim bynta ka kane ka workshop kaba la phaikhmat sha ki bynta bapher bapher jong ki ain kiba iadei bad ki hok jong ki khynnah.
Ka Chairperson jong ka MSCPCR, ka Kong Iamon M Syiem ka la ai jingkren ha kaba ka la ong ba kum kane ka workshop na ka bynta ki nongthoh khubor kan iarap ban iada ia ki hok jong ki khynnah bad ka la ong ruh ba kum kine ki jingialang ki dei ban bteng nangne shakhmat.
Ka Kong Syiem ka la pdiang ia ka bynta ba ki lad pathai khubor ki don kum ki nongiada jong ki hok jong ki briew. Ka la ong ruh ba ki lad pathai khubor ki don ka bynta kaba khraw ban pyni ia ki jingduna ha ki kam ba pyntrei na ka bynta ka jingiada ia ki khynnah.
Ki lad pathai khubor ki la pyntip ruh shaphang ki case bapher bapher bad kane ka iarap ia ka NCPCR ba kan shim ia ki sienjam haba don kano kano ka jingiuh roit ia ki hok jong ki khynnah, ka la ong.
Ha ka technical session, u riewshemphang na ka NCPCR, u Paresh Shah u la kren shaphang ki ain bapher bapher kiba iada ia ki hok jong ki khynnah. U la kren shaphang ki bynta kiba iada ia ka kyrteng jong ki khynnah bad ka bynta jong ki lad pathai khubor ban iada ia ki hok jong ki khynnah. U la ong ba ki bynta bapher bapher jong ki hok jong ki khynnah ki don hapoh ka jingiada jong ki ain ka ri.
U Shah u la kren shaphang ki bynta hapoh ka IPC kiba don ha ka ri na ka bynta ka jingiada ia ki hok jong ki khynnah. Da kaba pdiang ia ka bynta jong ki lad pathai khubor ha ka jingiada ia ki hok jong ki khynnah ha kane ka ri, u Shah u la ong ba dei ban long kiba husiar haba pathai khubor shaphang ki case kiba iadei bad ki khynnah khamtam ha kaba kine ki don jingiadei bad ka jingshah leh beijot ki khynnah, ka jingpynmih kyrteng ia kum kine ki khynnah bad ki kam ba iadei bad kane.
U la kdew sha ki bynta ka Prevention of Child from Sexual abuse (POCS0), 2012, hapoh ka section 74 jong ka Juvenile Justice (Care and Protection of Children) Act, 2015 bad hapoh ka section 228 A (1) jong ka Indian Penal Code ( IPC),1860. U la ong ba ka jingpynmih kyrteng jong ki khynnah kiba la khlad noh ruh ka long kaba lah ban shah pynshitom hapoh ka section 74 (1) jong ka JJ Act, 2015.
U Shah u la ong ba ki bor bapher bapher ha ka ri ki la wanrah ia ki kyndon bad ki jingbatai kiba iarap ia ki lad pathai khubor ba kin ai jingtip shaphang ki hok jong ki khynnah ha ka rukom kaba dei. U la ong ba ki nongthoh khubor ki ju pyni ia ki jingeh jong ki khynnah kiba don ha ki jingjynjar namar ka apot jong ki lane ka jingshah leh bein ha ki riew Rangbah.
Hynrei ka long ruh kaba donkam ban peit ia ka ‘bynta jong ki khynnah’ ha ki khubor kiba kham shyrkhei bad ruh ha ki serial ba pyni ha ka tv, u la ong. Kito kiba thoh ia ki script ki dei ban kynmaw ba hapoh ka hok ban kren ia kaba ngi sngew, haba ngi thoh shaphang ki khynnah, ngi dei ban pyndonkam ia kane ka hok da ka jinghusiar namar ka jingim jong ki khynnah ki don ha ka kti jong ki.
Ki khubor ki dei ban long kiba ai jingtip bad kiba kiar na ka jingpynshyrkhei. Ki khynnah ki dei ban long ka bynta kaba kongsan na ka bynta ki lad pathai khubor bad ym dei ban shim kabu ia ka ka jinglui lui jong ki.
U la ong ba ki nongthoh khubor kiba sngewthuh ia ka jingktah jong ki khubor jong ki, ki sngewthuh ia kane ka jing luilui jong ki khynnah bad ki ngeit ha ka jingthoh ia ka khubor kaba dei bad ki burom ruh ia ki hok jong ki khynnah bad kumta ki dei shisha kita ki nongiada ia ki hok jong ki khynnah.
Ka DCPO jong ka Tnat Social Welfare, Kong ML Warjri ka la kren shaphang ka jingktah ia ka jingmut jingpyrkhat jong ki khynnah kiba shah leh bein bad ka la ong ba ka jingthoh khubor shaphang kum kine ki case ka lah ban don ka jingktah kaba shirta ia ka jingmut jingpyrkhat bad ka burom jong kum kine ki khynnah.
Ka la ong ba ka jingkhein sting jong ki nongthoh khubor ia kane ka lah ban wanrah shibun ki jingeh ia kum kine ki khynnah. Ka burom bad ka jingheh jingsan jong ki khynnah ka long kaba kongsan bad dei bad iada ia kane man ka por haba thoh khubor lane pynmih prokram shaphang ki khynnah, ka la bynrap.
