Pynlong ka Raid Bhoi Mikir ia ka shad tynrai ban pynneh pynsah iala ka riti dustur

Nongpoh Jymmang 31: Ryngkat ka thong ban pynneh pynsah ia ka riti dustur, ka Synjuk jong ki nongsynshar Raid Bhoi Mikir (Karbi) ha ka 31 tarik u Jymmang ka la pynlong da ka programme ban lum ban lang ia ki nongiashim bynta kiba la pyni ia ki dustur riti jong ki la ka dei ha ka jingshad tynrai, ki rukom tem tynrai, ki rukom leh niam bad kiwei kiwei kiba kynthup ia ka rwai ka siaw. Kane ka jingpynlong ia kane ka programme ka dei ka sien kaba ar bad kaba la pynlong kyrpang naka bynta ki jaidbynriew Bhoi Mikir (Karbi) kiba dei na ki shnong bapher bapher jong ka Ri Bhoi District bad la pynlong ia kane ka programme ha ka shnong Umwang jong ka Raid Umwang, Mylliem Syiemship. Kane ka programme ka long ruh shi bynta ban pyni sha ka imlang ba ki jaidbynriew Bhoi Mikir (Karbi) ki don ia ki riti ki kolshor kiba bun kiba dei ban pynneh pynsah namar ka jaidbynriew ka im katba ka riti ka dustur ka dang im bad neh.

Ha kane ka sngi, u Bah Pynshngaiñ N Syiem, Chief Executive Member ka Khasi Hills Autonomous District Council u la wan ban ia don lang bad shim ia ka bynta kum u Kongsan. Nalor u Kongsan, kiba la ia donlang ki kynthup ia u Bah Wallambok Mylliemngap-MLA ka Jirang Constituency, u Bah CB Syiem-CEM barim ka KHADC bad MDC barim ka Nongpoh Constituency,  ki dkhot ka Synjuk Ki Nongsynshar Raid Bhoi Mikir (Karbi) ba lam khmat da u Chairman u Bah RR Klein u ba dei ruh ha kajuh ka por u Acting Syiem ka Raid Kharsati bad u Bah Moris Ingtih kum u General Secretary kynthup lang kiwei kiwei ki dkhot  kumjuh ki Lyngdoh Raid, ki Syiem Raid, ki Bangthai Raid, ki Longsan Raid bad kiwei kiwei. Kumjuh ia kane ka programme la pynlong ha ka jingiatrei lang bad ki dkhot ka Meghalaya Karbi Women Social Welfare and Cultural Association (MKWSW&CA).

Ha kane ka programme,  la wan ban ia donlang ruh da u Bah BS Teron – President ka All Meghalaya Karbi Association (AMKA),  U Basan ka Raid Nongkseh u Bah Nathaniel Thangkhiew, U Myntri K Langstieh jong ka Hima Mylliem,  U Paiem Labourius Syiem- Syiem ba rim ka Hima Mylliem,  u Bah Jason Mawlong lem ki paidbah kiba la wan ban ia shim bynta na kylleng ki Raid ka Hima Mylliem kiba dei ki jaidbynriew Bhoi Mikir (Karbi). Ki dkhot ka Meghalaya Karbi Women Social Welfare and Cultural Association ki la pynlong ruh ia ka jingpyni jingiakop thei bhabriew ba la tip kum ka Miss Karbi 2017 ia kaba la dep pynlong ruh ha ka 20 tarik u Jymmang. Kiba la jop na kane ka jingiakop ki long ka Sushila Taropi,  ka Profita Kropi bad ka Seriti Timungpi.

Nalor kiwei kiwei kiba la ai jingkren ha kane ka programme kiba la pynpaw ka jingai khublei ia ka Synjuk kaba la shim ia kane ka sienjam ban pynlong kane ka Cultural and Traditional Programme ka ba long kaba dei eh ban pyni ba ka riti dustur ka don la ka dei ha kano kano ka bynta jong ka imlang sahlang. U Bah Pynshngaiñ N Syiem u la pynpaw ba ki Bhoi Mikir ki pyni ia ka rukom tynrai ia jong ki bad ka pyni ba ki long kiba riewspah ha ki riti dustur. “Hynrei kaei kaba donkam eh ka long ban teh skhem ia ki bor synshar la ki dei ki Syiem, ki Basan, ki Rangbah Shnong ne ki Lyngdoh da ki ain ki ba lah ban teh lakam pat ia ki riti dustur jong ka Jaidbynriew “, la ong U Bah Pynshngaiñ N Syiem u ba la pynpaw ba ka sorkar hi kam shym la kitkhia ha kaba ia dei bad kane ka bynta ban pynskhem ia ki riti synshar ha