Shillong, Jylliew 03: Ka FKJGP Upper Shillong Circle kam lah khlem da pynpaw ka jing sngew nguh ia ka ophis treikam jong u Executive Engineer PWD Road, National High Way Division kiba la shimkhia ia ki jingdawa jong ka Seng ban pynurlong ia ka jingangnud jong ki Paidbah Nongshong Shnong jong ka Thain Upper Shillong hi baroh kawei.
Ka Seng ka ai khublei kyrpang ia u Bah Y. Lyttan, SDO PWD Road, National High Way Division ia ka jing long kaba la kloi bad ka jing shimkhia jong utei u officer ban ia leit jurip ryngkat bad ka Seng ha 23th May 2017 ia ka surok bah Upper Shillong naduh 7mer ter ter shaduh ki bynta hashwa ban poi Lummawbah.
Ka Seng ka sngew ba ka jing don ia kum kitei ki Officer kiba don shisha ka jingkitkhlieh ka long shisha ka jingkyrkhu ia ki Piadbah Nong Shong Shnong namar u dei u Officer uba bat iala ka kular ha kaba la lah ban pynurlong ia ki jing angnud jong ka Seng ban Repair biang ia ka Surok tang hapoh shi taiew hadien ka jing leit jurip nalor ba katei ka Surok bah kadei kawei na ki Surok bah kaba donkam tam.
Ka jingdon kam, ym tang ba namar kiba bun ki Heh ki Hain kiba ju hiar da ki Helipad ha 7mer Upper Shillong ki ju iaid na kane ka surok bah ban poi sha Nongbah Shillong, hynrei ka long ruh kum u metbah kaba pyniasoh ia ka East Khasi Hills, West Khasi Hills, South West Khasi Hills bad kumta ter ter ha kaba ki Nong Shangkai Pyrthei na kylleng kylleng kiba leit sha Shillong Peak, Elephant Falls, Sohra, Dawki, Mawlynnong bad kiba bunbah kiwei de ki jaka jngohkai pyrthei kiba pawnam ki hap ban iaid na kane ka surok bah.
ka Seng ka Kitbok kit rwiang ia u Executive Engineer & SDO PWD Road, National High Way Division ba kin nang lah ban ai ia ka jing shakri kaba kham bha ha ki sngi bad ki por ki ban dang wan baroh bad kum ka Seng Ngi Khmih lynti ba kane ka Mynsiem jong ka Jing ia treilang kan nang iai bteng shuh shuh nangne shakhmat khnang ba kiei kiei baroh kin long kiba iaid beit iaid ryntih na ka bynta ka jingbit jing biang jong ki Piadbah Nong Shong Shnong jong ka Thain bad ba kan long ka jingmyntoi ia ka jaitbynriew hi baroh kawei.
