Shillong, Rymphang 26: Ka Khasi Students’ Union (KSU) lyngba kane ka kyrwoh ka pynpaw ia ka jingsngewsih kaba jur halor ka jingkhlad kyndit noh jong u bah Rudy Lyngdoh Tron ha ka step jong ka 25 tarik u Rymphang 2019 uba dei u nongialam barim jong ka seng. Ka seng ka pynpaw ia ka jingsngew tmang bad duhnong halor ka jingkhlad jong une u samla rangbah uba la shakri bad aiti met bad mynsiem na ka bynta ka dawbah ka Jaidbynriew naduh ba u la pyniasoh bad ka KSU haduh ki sngi ba khatduh ki jong u.
U samla Rudy u la pyniasoh la slem bha bad ka KSU kum u dkhot ka KSU Lummawbah Unit bad u la bat ruh kum u President kane ka Unit bad ka Upper Shillong Circle. Ha u snem 2008 la ibit ia une u samla ba un long u dkhot ka Central Executive Council (CEC) kaba ha kato ka por la lam khmat da u bah Samuel B. Jyrwa bad u bah Hamlet Dohling.
Ha u snem 2012 pat la jied ia u ba un long u Assistant Organising Secretary ka KSU CEC hapoh ka jingialam u bah Daniel Khyriem bad u bah Auguster Jyrwa. U la bat ia kane ka post tad haduh ynda u la shongthait ha u snem 2017. U samla Rudy u la long ruh kum u in charge jong ka KSU North Khasi Hills District Unit.
Ka seng ka phah ia ka jingsngewlem sha ka iing ka sem ka jong u bad kan iai don ryngkat ruh bad ki ha kum kane ka jingjia ba sngewsih. Ka seng kan iai pyrto ia ki jingnoh synniang jong une u samla rangbah ba khlem da khein ne thew na ka bynta ka dawbah ka Jaidbynriew.
