Shillong, Lber 21: Ka FKJGP Central body ka pynrem jur ia u nongthoh jong ka kot Indian School certificate Sociology Class XII, u Manjir Ghosh bad la published da Kalyani publishing bad ha kane ka kot ka la thoh shaphang ka shongkha shongman jong ka jaidbynriew khasi.
Ha kane ka kot sla numbor 1.37 & 1.38 ka la don ka jingthoh shaphang ka jaidbynriew Khasi ia kaba ym shem la iahap satia wat khyndiat ruh bad ha ka juh ka por ka la ktah mationg bad pynthohbria ia ngi kum ka jaidbynriew namar la batai ha kane ka kot ba ka khynthei khasi ka lah ban ioh lok bun ki shynrang.
Ha katei ka kot la thoh ruh kumjuh ruh la thoh ba lah ban ia shongkha shiiing shisem bad u shynrang hadien ba u lah iathoh u wan tang ha ka por miet bad mynsngi ym ju leit, bad la ong ruh ba u shynrang u lah ban buh bun ki kynthei shawei nalor ka lok bad ia kane ka kot la thoh pyrshah ia ka ain bad ka dustur jong ka jaidbynriew khasi.
Te kumta ka seng ka dawa na ka sorkar Meghalaya ban shim khia ha kaba iadei bad kane ka kot namar ka wanrah bad pynsgewthuh bakla ia ki khynnah kiba pule ha ki class XII bad ia kiwei ruh kumjuh shaphang ka jaidbynriew khasi bad ha kane ka kot ruh la thoh KHASHI haka jaka KHASI.
Ha kajuh ka por ka seng ka dawa na ka sorkar bad kumjuh ruh ia ki nonghikai ba shuwa ban pyndonkam ia ka kot sha ki khynnah ki la dei ban pule (study) shuwa ialade khnang ban lah ban sngewthuh la ka kot ki biang ne em ban pyndonkam ia ki khynnah.
Ka Seng Ka pynrem jur ia une u nongthoh Manjir Ghosh bad ka dawa na ka sorkar ba dei ban pynshitom bad ban kem ia une u briew uba lah pynjah burom ia ka jaidbynriew khasi jong ngi baroh kawei.
Lada ka sorkar kam shimkhia na ka liang ka seng kan khang jubor ban pyndonkam ia kane ka kot ha ki school baroh kiba pyndonkam ia ka.Kane ka long ka kyrwoh na u Reginald Thabah, Education Secretary, FKJGP Seng kmie.
