SHILLONG, Nailar 09: Ka Seng Kur Thangkhiew Lai-kpoh ha ka jingialang jong ka Central Executive Committee (CEC) ha Nongkseh kaba la long ha ka 2 tarik Nailar, 2014, da kawei ka jingmut ka la shim ia ka rai ban pynrem jur halor ka jingthombor pyrshah jong ki mynder ri ia ki Enforcement bad ia ki Nongthoh khubor ha Nongbah Shillong dang ha kine ki sngi ba la dep.
Ka thymmei khubor ba la phah da u Bah Kyrmenskhem Thangkhiew, general secretary katei ka seng kur, ka la ong ba ka seng ha katei ka jingialang ka la pynrem jur ia ki mynder ri kiba la nud ban thombor bad kaba la wanrah ruh ia ka jingmynsaw ia ki 5 ngut ki pulit ka tnat Enforcement jong ka Khasi Hills Autonomous District Council (KHADC) bad ia ki Nongthoh khubor bad khamtam eh ka kur ka
pynrem jur halor ka jingshah thombor u Bah Teilang Thangkhiew uba la
mynsaw jur ha katei ka jingjia katba u dang shim bynta ha ka kamram ba
u don ban iada ia ka khaïi pateng jong ka ri bad ka jaidbynriew.
Katei ka seng ka ai khublei ryngkat bad ka jingiaroh ia ka Eecutive Committee (EC) jong ka KHADC hapoh ka jingialam u Bah Ardent Miller Basaiawmoit kum u Chief Executive Member (CEM) bad u Bah Latiplang Kharkongor, Executive Member ka tnat Trade, namar dei lyngba jong ki ba la lah ban pynlong ia katei ka jingkhynra ia ki trading license ban tehlakam bad pyrkhing ia ka jingiohlad ki mynder ban wan
khaïi pateng ha kane ka Bri u Hynñiewtrep.
Ka thymmei khubor ka ong shuh shuh ba dei tang kane ka EC kaba mynta kaba don shisha ia ka jingkitkhlieh ban khanglad ia ka jingwan khaïi be-aiñ jong ki mynder kaba long ruh kum ka jingiada ia
ki trai muluk trai ri ba kin iohlad ban kamai kajih.
Ka Kur Thangkhiew Lai-kpoh ka phah ruh ia ka khubor kitbok kitrwiang sha baroh kito ki lanot kiba la mad ia katei ka jingjia ba kin ioh noh ia ka met kaba koit ba khiah bad ka seng ka ai khublei ruh ia kito ki seng bhalang kiba la mih shakhmat ban ai mynsiem halor katei ka jingjia bad ia u Bah Teilang Thangkhiew ha ka por ba u dang don ha jaka sumar bad khatduh eh ka Kur ka phah ruh ia
ka khubor sha ka EC-KHADC ba kan nang lah ban treibor bah ban khanglad ia ka jingwan kyrthep ki mynder sha kane ka rilum Khasi.(SP News)
