Shillong, Rymphang 22:Mynta ka sngi ka kynhun ki rangbah shnong bad ka Narpuh Border Area Joint Action Committee na ka thain Narpuh kila ia kynduh ia u myntri rangbah ka jylla u Conrad K Sangma ban dawa ia ka Community and Rural Development Block ha poh ka thain Narpuh.
U bah Daiapherbha Lamare Secretary jong ka Narpuh Border Area Joint Action Committee (JAC) haba kren ha ki lat pathai khubor ha dien ka jingiakynduh ia u myntri rangbah ka jylla la ong ba ka jingwan jong ki ka long ban kurpad ia u myntri rangbah ban ai ia ka Block thymmai ha Lumshong.
U bah Lamare la ong ba ia ka Khliehriat C&RD Block la pynkynriah sha Wapung bad kane kala dang buh shuh shuh ia ki paidbah ka thain ba don ha khappud Bangladesh bad Assam kala buh ia ki paidbah ha ka jingeh, la ong ba don ki shnong ki hap ban iaid palat 100 km.
Ha kane ka jingiakren na ka liang jong ka thain Narpuh kala kular ha khmat jong u myntri rangbah ka jylla ba lada ka sorkar kan ai ia ka Block kin ai ei ruh ka jaka ha Lumshnong, ym tang ia ka jaka hynrei kin pynshna ruh ia ka ophis kaba don kam dei tang ba ka sorkar kan pynmih ia ka jinpynbna sorkar.
Bah Lamare la ong ba ka jingiakren ka long kaba jop, namar na ka liang jong u mytnri rangbah ka jylla u la kren shai ba um kwah ban ai ia ka jingkular mynta hynrei kin sa iohi ha ka dorbar mang tyngka ha kaba ia dei bad ki Blok bad kum ba ka long mynta kila don ka jignkyrmen ban ioh ia ka block.
Kum ka kynhun naduh u snem 2018 kila ia kynduh ia u myntri rangbah ka jylla la ong ba ynda la pynkynriah ia ka Blok na Khliehriat sha Wapung ka sorkar kan sa leh ia kaba don kam bad mynta ki wan biang ban ia kynduh halor kane namar la dep ban pynkynriah ia ka Blok sha Wapung.
Ha kane ka jingiakren u myntri rangbah u la ong ba un sa pynbna haduh 10 tylli ki Blok thymmai bad ka Narpuh ka dei kawei kin sa peit ia kata lada ka sorkar kam lah ban ai ka JAC kan sa shong jingialang bad kane ka jingdawa ka long ba ka thain ka dang sah dien palat wat ha dien 50 snem ba la ioh ia ka jylla.
La ong ba naduh ka por sorkar Congress haduh mynta kane ka thain kala shah ieh bein wat la ka dei ka thain kaba la pynmih shibun ka pisa na ka bynta ka sorkar jylla kum ka khajna, ki MLA kila wan wei ha dien u wei hynrei ka thain ka dang sah ban bein kyrmen ba da la wan ka dorbar mang tyngka kin sa ioh ia ka Blok.
Ki shnong ki ban hap ha kane ka blok kaba ki dawa ki don 50 tylli ki shnong bad ki shnong kiba jngai eh dei ka Mawlidor bad Ratachera, bad ki don kiwei ki shnong ruh kiba kham jngai ka sorkar kam don daw ba ka sorkar ban ong ba kam don pisa.
