Shillong, Naitung 09: U MDC ka Mawlai Constitunecy Bah Process T Sawkmie, ula leit jurip ia ka jaka ot doh ka tand ri jingri jong ka Sorkar Jylla, kaba don ha Mawlai Mawiong.
Ka jingleit jong u Bah Process ban jurip ia kane ka jaka ot doh ka long ban twad jingmut na ki Ophi-sar ka Tnad haba iadei bad ka rukom pyntrei ia ka Project bad ban kylli pynthikna ruh ioh kane ka Project ka don jingktah ne pynjot ia ka mariang kumba la artatien da ki paid bah ka thain. Ia u Bah Process la synran lang da u Asst Director ka Tnad Dr KB Sahkhar, u Engineer ka Tnad, u Contarctor lem bad ki Rangbah, ki Longkmie bad ki Samla jong ka shnong Mawlai
u Bah Process ula pynpaw ia ka jingsngewkmen halor ka jingwan jong ka Project ha Mawlai hynrei ula buh pat ia ka jingkyntu ba ka Tnad ka dei ban shimkhia bha ha kaban khmih ba ki jaboh kiba mih na ka jingot doh, kim dei satia ban tuid sha ka Wah Umshing, kaba dei ka tyllong umbam umdih jong ka shnong Mawiong.
Halor kane ka bynta, u Dr Sahkhar ula pyntip ka Tnad kala kitkhia bha ia kane bad ka pynthikna ba baroh ki jaboh ba tylli ne ka um, na kane ka jaka ot doh kin neh beit hapoh bad yn nym don khyndiat ruh ban leit bret, theh ne pyntuid shabar.
“Ia ka jaboh um, ngi la shna ia ki pung ban pyntuid ia ki jaboh ba kynthup ia ki pung ban pynkhuid ia ki jakhlia bad ka pung ban pyllang ia ka um bala dep pynkhuid, kaba lah ban pyndonkam ban siat ban khlieng bad ban ri Dohkha ruh” ong u Dr Sakhar.
Haba kylli pat halor ka jaboh ba long doh jong ka masi, sniang ne blang, u Dr Sakhar u pyntip ba ka project ka kynthup ruh ia ka Treatment Plant ban pyn iakhlad ia ka jaboh um bad ba tylli bad ia kane ka jaboh tylli, yn sa pynkhuid bad tylliat ia ka da ki kor machine ba kan long sboh rep jingrep.
U tei u heh ka tand Ri jingri u pyntip ruh ba na ka liang ka Tnad kala dep iasyllok bad ki Seng jong ki Nong shoh doh bapher bapher ka Jylla bad kala tyrwa ia ki ba kin ai ka jingiatrei lang ha ka ban pyndonkam ia kane ka jaka shohdoh ka sorkar na ka bynta ban lah pynmih ia ka doh kaba khuid ka ban die sha u paidbah bad kumjuh ruh ban lah tehlakam noh ia ka jingpynjakhlia ia ka mei mariang.(SP News)
