Shillong, Jymmang 04: Na ka liang ka BJYM Meghalaya kam sngewiahap iaka jingthmu jong ka sorkar jylla ban aiti sha ka Meghalaya Mineral Development Corporation Limited ban tih dewiong ha ka jylla.
Kane ka jingthmu ka long kum ban knieh noh ia hok longtrai jong ki trai ri trai muluk halor ka khyndew ka shyiap bad ki marpoh khyndew katkum ba la pynkup bor lyngba ka Sixth Scheduled.
Bad ka jingaiti noh ha ka Mineral Developer cum Operator (MDO) ban tih ia u dewiong ka la pynkmen bad plie lynti lypa ia ki company heh bad ki hehspah ban iuhroit pat ia ka lad kamai jakpoh jong ki rit ki ria bad kan wanrah ka jingma ia ki riewpaidbah bad bad ia u dewiong yn trei tang da ki heh saipan lyngba ka jingiarap ki heh sorkar.
Kane ka jingthmu jong ka sorkar ka long ruh kum ka jingiuhroit bad kdiah noh ia u budlum jong ka Sixth Scheduled da kaba iaid lait ia ki District Council.
Ha ka jingshisha ka iingbishar N.G.T. badon burom ka kwah ia ka sorkar jylla ban wanrah ia ka rukom tih dewiong kaba pyntikna ban ym ktah ia ka mei mariang (Environment) kynthup ia ka um, ka lyer bad ia ka jingkoit jingkhiah jong ki nongtrei bad ki paidbah, ym ban knieh noh ia ka hok longtrai jong ki paidbah halor ka khyndew ka shyiap.
Ka jingkylli ka long ba, hato ban wanrah ka jingiada ia ka meimariang, ka jingkoit jingkhiah jong ki briew donkam ban da iapein ia ka hok longtrai jong ngi halor ka khyndew ka shyiap?.
Ngi la dep mad lypa ia ka jingkordit jong ki paidbah bad jingdap ram ka pla tyngka jong ka sorkar jylla lyngba ki corporation bad ki undertaking kaba la pynsyrtok ia ki paidbah bad pynlehrain ia ka jylla kumba long ka MCCL, MeECL bad ka MTC kiba long ki ktem bamsap ia ki minister bad ki heh sorkar, kumta kaei ka ban jia ia ka jylla lada wan sa kata ka MMDC.
Kumta na ka liang ka BJYM ha ka jingialang kaba la long ha ka 4 tarik May 2017, ka kyrpad ia ki paidbah ka jylla ban long kiba husiar bad peit jngai lypa halor kane, ban ym ngop ha ki jingpynbiej jong ka sorkar jylla. Ong ka kyrwoh kaba la phah da u Bah Egenstar Kurkalang president ka BJYM jong ka seng BJP.
