Shillong, Lber, 03: Ka Dorbar Shnong Mawsynram kaba la iakynduh kyrkieh mynta ka sngi Palei ka la rai ban khot ia ka Executive Committee jong ka shnong ban shim ia ki rai kiba tyngeh pyrshah ia ka FKJGP, Mawsynram Circle, hadien ba kane ka kynhun Sengbhalang na kane ka thain ka la phah ia ka jingthoh sha ka tnat ka Koit ka Khiah ka Sorkar Jylla ban dawa weng mardor ia u Dr. Habamut Lyngdoh, uba la ai ka jingshakri ia ka Mawsynram CHC, da kaba kynnoh ba u la pynlong ia kane ka jaka ai jingsumar kum ka Karkhana shna pisa.
U Bah M. Marbaniang, Rangbah Shnong ka Mawsynram, u la ong ba ka jingkynnoh jong ka FKJGP pyrshah ia u Dr. Hamamut Lyngdoh ka long ka bym nongrim satia bad iathuh ba kane ka jingtuklar jong ka FKJGP da kaba iaid lait ia ki bor pyniaid shnong ka la pynbitar ym tang ia ki nongialam shnong hynrei wat ia ki paidbah nongshong shnong ka Mawsynram. Hynne ka sngi ki paidbah ki la hiar sha iingsah u Rangbah Shnong ban pynpaw ia ka jingbitar pyrshah ia kane ka jingmushlia jong ka FKJGP.
“Ka jingmushlia jong ka FKJGP ka dei tang ka jingkhwan myntoi jong ki katto katne,” u ong une u Rangbah Shnong bad bynrap, “wat ki dkhot ne kiwei kiwei pat ki nongkitkam ka FKJGP kiba don ha Mawsynram haba ngi la pyrshang tohkit, ki pynpaw beit ba kim don jingtip ei ei halor kane ka jingtuklar ka Seng.”
“Ka jingbuh u Dr. Habamut ia ka Clinic kam dei ba u lum spah bad ngi sngew diaw haduh katta katta ia ka jingkynnoh bad jingshah kynthoh jong une u Doktor, namar u dei u briew uba kitkhia ia ka kamram ba la bynshet bad u nongsumar uba tbit ha ka kam. Ka Shnong hi kan ym ailad ia ka FKJGP ba kan iaid da kane ka lynti ban shu pynthohbria ia u briew uba trei hok ia kam,” ong u Rangbah Shnong.
Haba pynshai halor ka jingkynnoh jong ka FKJGP ia ka jingbuh ‘Private Clinic’ jong u Dr. Habamut Lyngdoh, ha Quarter jong u, u Bah A.S Kharnaior, General Secretary ka Synjuk ki Nongsynshar Shnong Mawsynram Area, u la ong, “ka shnong hi kam shym la pynhap kyrdan ‘Private Clinic” ia kane ka Clinic bad nalorkata, ka Shnong hi kam don kano kano ka jingsngew buhkhoh ne jingwit ia ka jingbuh u Dr. Habamut ia ka Clinic, namar da ka jingdon kane ka Clinic ka pynsuk shikatdei eh ia ki paidbah kiba pang bashitom khamtam ha ka miet ka iong.”
“Naduh u snem 1999 haba ka jingpang prie pynhiar ka la sar ia ka thaiñ Mawsynram, ngi la don ka jingiakren bad ka DHS ha Shillong bad mynjur ruh ban ailad ia ki Doktor kiba wan shakri ha kane ka CHC ban buh ia ka Clinic,” u la ong bad bynrap, “dei naduh une u snem hadien ba ka Dorbar Shnong Mawsynram ka la iohi ba ka jingdon jong ka Clinic ka long ka jingkyrkhu ia ki paidbah ba la ailad ia uno uno u Doktor uba wan shakri ha ka CHC Mawsynram ban buh ia ka Clinic. Kumba ka long mynta, u Dr. Habamut Lyngdoh ruh u plie ia ka Clinic jong u hadien ba ladep ka kamram shakri ha ka OPD ym ha ki kynta ba u dang hap ban shakri ia ki nongpang.”
U Bah P.W Shangpliang, Secretary ka Dorbar Shnong Mawsynram u la ong, “kane ka jingkynthoh jong ka FKJGP pyrshah ia une u Doktor kam dei satia kaba thymmai. U la ong ba ka Shnong hadien ba ka la ioh ujor na ka Seng, ka la leit jurip ia ka Mawsynram CHC bad lap ba baroh ki iaid beit bad ka jingkynnoh pyrshah ia ka DM&HO ka la rah tang shiliang ia ka tarajur, ka long tang ka jingkynnoh ka bym shong nongrim haei haei ruh.
Bun na ki paidbah kiba la wan tur sha ka ing u Rangbah Shnong hynne ka sngi, ki la dawa ba ka Dorbar Shnong ka dei ban shim da ka rai kaba tyngeh pyrshah ia ka FKJGP bad pynpaw ruh ia ka jingbitar da kaba dawa ba ka Shnong ka dei ban pyndonkam ia ka iktiar ba la pynkup bor da kaba pynkut syndon ia ka jingdon jong kane ka seng ha ka thaiñ Mawsynram.
Ha kane ka sngi la iadon lang ruh u Bah A. Kurkalang, Rangbah Shnong ka Dongshiliang, Mawsynram bad ryngkat ki nongialam shnong kiba la pynpaw ia kajuh ka jingpyrshah ia ka FKJGP.(SP News)
