Shillong, Naiwieng 24: Ka CEC jong ka seng HYC ka pynpaw ia ka jingsngew pyrshah halor ka jingleh kyrkieh jong ka MBOSE ban pynkylla ia ki kot pule ha ki kyrdan pule ha ki skul hapoh ka jylla lyngba ka jingpynbna ka jong ka ha ka 14 November, 2017 da kaba khot ia ki Publishers ban soi ia ki Kontrak.
Ka Seng hoid kam pyrshah ba lahdei ka por ban pynkylla ia ki kot ha ki kyrdan pule bapher bapher ha ki skul ha ka jylla nad ruh ka jingiog kontrak jong jongno ruh ia kane ka kam hynrei ka pyrshah bad sngewdiaw halor ka jingleh kyrkieh jong ka MBOSE ia kane ka bynta.
Ka MBOSE ka khlem da pyrkhat bha ia ki jingktah ba lah ban mih na kane ka jingleh torti. Ka seng ka kwah ban tip ba kumno hapoh shibnai ka MBOSE ka la lah ban pule ia ki manuscript ba lah phah da kiba bun ki Nongpynmih kot na ka bynta ki kyrdan pule bapher bapher. Hato kane kan nym pynlong pynban ia ka jingpyntroin ia ka pule puthi ha ka jylla lyngba ka jingwanrah ia kot ki bym biang ha ki sobjek bapher bapher?
Ka jingkhmih bad bishar ia ki kot pule kadei ban long kaba bniah bha khnang ba ki kot pule kin tei ia ka jingnang jingtip jong u khynnah pule. Ka jingleh sting bad jingleh kyrkieh ban wanrah ia ka jing pynkylla jong ka MBOSE ia ki kot ka pynpaw ba lehse don ei ei sha lyndet.
Katkum ki jingtip jong ngi ruh, ka syllabus jong ka National Curriculum Frameworks ( NCF) ruh ka lah ban wan ha u bnai Nohprah mynta u snem. Hato ka MBOSE kan pynkylla biang ia ka syllabus jong ka ban pyniahap bad ka syllabus jong ka NCF. Mano ban kitkhlieh ia kane lada don ka jingkylla lyngba ka jingpynbna jong ka NCF. Ne ki leh khnang mamar ba ki tip ba kan don kaba kum kane??
Ka Seng ka pynpaw ruh ia ka jingsngew kyndit ba dang mynta u snem 2017 ka MBOSE ka dang shu dep leh Revision ia ki kot pule ha ki class 8, 9 bad 10 ha ki katto katne ki subjects. Kumno kynsan kynsan mynta lah shu pynkylla noh ia kita ruh. Kane ka ktah shibun ia ki nongpynmih kot khamtam ia ki nongdie kot ba rit ba ria ha ki dukan shnong ne nongkyndong. Ka stock kaba ki don lehse kin hap ban shu bret noh. Ka jingduhnong bakhraw kan long ia ki. Mano ban buria ia kane ka jingduhnong ka jongki.
Sa kawei ka ban ktah kadei ia u duk u suk uba don bun ki khun ban phah pule. Kumjuh ruh Bun ha Nongkyndong ki ju ia ai kylliang ia ki kot ne ki buh ia ki hymmen para kiba ia leit skul lang ban ia pule ia kajuh ka kot.
Ka MBOSE ka lah dei ban da pyrkhat bad pyntip paidbah lada ka don kano kano ka jingthmu ban pynkylla ia ki kot ha ki skul, kadei ban da bishar bniah bad kham kylluid ka por ia ki kot ba ka thmu ban phah pule ha ki skul bad ka dei ban pyntikna ba ki kot kiba ma ka ka bthah ban phah pule kidei ban dei kiba biang bad kiba iahap katkum ka jingdawa jong ka por.
Ka seng ka dang pynkhreh ban wad jingtip na ka MBOSE halor kane ka jingleh ka jong ka naduh ki Minutes jong ki Meeting bapher bapher halor kane ka kam, ka kyrteng jong ki Experts ne ki Nong Review ia ki Manuscript jong ki kot, ki kyrdan pule bad experience jong ki bad kiwei kiwei ki jingtip ha kaba iadei bad kane ka kam khnang ban lap ia ki jingshisha.
Ka seng ka dawa ia ka MBOSE ba kadei ban weng ne pyn sangeh shwa ia ka Jingpynbna ban pynkylla ia ki kot pule ia mynta u snem 2018 bad bishar bniah ruh ia baroh ki kot shwa ban shim ia ka rai ban khot ia ki Kompeny pynmih kot ban ai ia ka kontrak ha ki.
Ka seng ka kyntu ruh ia ki Nonghikai, nongpyniad skul, stad pyrkhat jong ka Jaidbynriew, ki Nongdie kot ha ki shnong ki thaw, ki kmie ki kpa bad baroh kiba sngew pyrshah ia ka jingleh jong ka MBOSE ba kin pynpaw ia ki jingsngew ki jong ki khnang ba ki khun samla pule ki jong ngi kin nym duh noh ia ka hok ban ioh ia ka jingnang jingtip kaba bha tam lyngba ki kot pule ki jong ki.
