Shillong, Kyllalengkot 06: Ka KSU South West Khasi Hills District ka pynpaw iaka jingpyrshah kaba jur halor ka jingkhot sealed Tender daka Atomic Minerals Directorate for Exploration and Research haka 27 tarik, Nohprah, 2016 na ka bynta ban drill uranium haki thain Nongjri jongka South West Khasi Hills District. Kumba ka seng , ka ieng skhem ha ka ban pyrshah ia u uranium , ki pyrshah ruh iakane ka jingthmu jongka tnad AMD.
Ha ka kyrwoh kaba la phah da u president ka seng KSU jong ka SWKD u Bah Forwardman Nongrem u la ong ba “Kum ka Seng Kumba ngi la shim iaka rai lyngba Ka jingialang paidbah kaba la long ha Ka 21. July.2016 kaba la long ha Mawkyrwat ban pyrshah bad ban nym ailad iaka UCIL ban wan tih ne drill uranium hapoh South West Khasi Hills District”.
Ka KSU ka ong ba, kane ka juh Ka rai paitbah kan treikam ruh pyrshah iaka tnad Atomic Minerals Directorate for Exploration and Research lada Ka nud ban iaid shakhmat. Ngi la iohi tyngkrein ruh watla kum ki paitbah jongka District ki pyrshah jur ban tih uranium phewse Kane ka tnad lyngba Ka tender kaba don iaka NIT. Nos. AMD/CD/NER/NONGJRIPLATEAU/2016-17/T-73 dated 27/12/2016 ki mut ban thom jubor iaka mon jongki paitbah.
Ka seng ka kren da kaba shai shaka sorkar, shaka UCIL bad ka tnad Atomic Minerals Directorate for Exploration and Research,” ba Kumba phim ju shongthait ban lushia iaka shongsuk shongsain jong ki paradoh parasnam, ngi ruh ngin nym shongthait ban iakhun pyrshah Badno Badno kampher wat lada kan poi Wat sha Ka jingiaumsnam ruh”.
Naka liang jongka Seng, ngi kren shai ba kan nym ailad ia ka tnad ban iaid shakhmat Halor kane Ka tender ba ka la pynbna paitbah bad shen kin sa shong Pyrkhat Sa Da kiwei pat ki lad ki lynti ban khanglad ia kane ka jingpyrshang jongka sorkar ban pynthud iaka shongsuk shongsain jongki para doh para snam ha ki thain Nongjri.
Ka seng ka kyntu namar Kata iaki paitbah jong ka District ban long ba la pynkhreh bad da lei lei ruh kim dei ban ailad ia ka sorkar ban lushia iaka lawei ba Phyrnai jong ka pateng Ka ban wan bad ia ka lawei jongki khun ki ksiew , la ong u Bah Forwardman Nongrem, President , KSU South West Khasi Hills District.
