Shillong, Rymphang 02: Ki nongshong shong ka Lady Veronica Lane ha ryngkat ki nongpynïaid ka Bethany Society, ka Bansara Eye Care, ka Mery Rice Center for Special Education, St. Edmund College bad ka Asian Confluence mynta ka sngi ki la pynpaw ïa ka jingpyrshah halor ka jingthmu ka sorkar ban pynkynriah ïa ki nongdie madan na Laitumkhrah Main Road sha Lady Veronica Lane.
Haba kren sha ki lad pathai khubor mynta ka sngi ha Shillong Press Club na ka liang ka Kong Monalisa Wankhar, kaba dei ka nongshong shnong kane ka jaka ka la ong ba ka jingpyrshah ïa ka jingpynbna na ka liang ka Myntri Sorkar ka Kong Ampareen Lyngdoh halor ka jingthmu ka sorkar ban pynkynriah ïa ki nongdie madan na Laitumkhrah Main Road sha Lady Veronica Lane.
Halor kane ka jingthmu na ka liang ki nongshong shnong kim don jingtip eiei halor kane ka rai. Ka la ong Kumba ka long mynta ka Lady Veronica Lane ka dei kaba khim haduh katta katta bad ka dei ka surok kaba ki briew kiba duna bor met ki ju pyndonkam ban poi sha Bethany Society bad Mery Rice Center for Special Education, sha ka Bansara Eye Care ka ban buh jingeh ia ki.
Ka jingong ka Myntri ba ynda la ai kane ka jaka sha ki nongdie madan ïa kane ka surok yn khang noh ban ïaid lyngba kane ka surok, kane ka rai kan long ka ban wan rah jingeh ïa ki briew ba wan phah sumar sha kine ki jaka sumar namar bun ki bym lah ban ïaid da ka kjat. Halor kane ka surok ka la long lypa kaba khim, kane ka rai kan ktah ïa ki nongshong shnong bad ki khynnah skul, khamtam ïa ki ba duna ka dkhot met.
Na ka liang u Brother Carmo na Bethany Society u la ong ba ngim shem la don kano kano ka jingpyrshah ïano ïano ruh hynrei kane ka rai jong ka sorkar kan ktah jur ïa ki briew ba duna bormet kiba ju pyndonkam ïa kane ka surok ban lait na ka surok bah. Kumta ngi kyntu ïa ka Sorkar ba ka dei ban bishar bniah biang ïa kane ka rai jong ki khnang ba kan ym ktah ïano ïano ruh.
Ka Kong Bertha Dkhar kawei na ki longkmie kaba don ka jingduna ha ki bor ïohi, ka la ong ba ïa kane ka surok ym tang ba ngi pyndonkam ngi ki briew ba duna bor met hynrei la ju pyndonkam ruh da ki khynnah skul namar ka long kaba shngaiñ ban ïaid namar ba ka ïada na ka surok bah bad kane ka dei ka surok kaba khapniah bha mynstep ne mynmiet.
Ka la ïathuh shuh shuh ba ha ka por ba ka Kong Ampareen Lyngdoh kala wan sha Bethany Society, kala ong ïa ngi ba ka jingshna ïa ki jaka ïaid kjat lane Foothpath kan long na ka bynta ban pynsuk bad pynshngaiñ ïa ki briew ba don jingduna dkhot met ba kin ïaid na kane ka jaka, hynrei mynta ki la thmu ban ai noh sha ki nongdie madan te haduh katno kane ka surok kan shngaiñ ïa ki.
