Jowai, Nohprah 10: Ka kynhun rwai Jingrwai Tyrai bapaw khmat jong ka West Jaiñtia Hills District, ka Rishot kala ïoh ïa ka nam jingjop ha ka jingïakop rwai tynrai halor ka phang HIV AIDS kaba la pynlong da ka Society for Urban and Rural Empowerment (SURE), Jaiñtia Hills mynta ka sngi ha H.K. Singh School, Jowai.
Ha kane ka jingïakop kaba la kyrshan da ka Meghalaya AIDS Control Society Shillong, la wan ïashim bynta da kiba bun ki kynhun rwai jingrwai tynrai na ki shnong kiba don hapoh ka West Jaiñtia hills District.
Ïa kane ka jingïakop rwai tynrai kaba long shi bynta ban ïathuh-paidbah halor ka jingma jong ka jingpang AIDS, la plie pyndonburom da u Garod L.S.N. Dykes uba long u deputy Commisioner jong ka West Jaiñtia hills district. Ha ka jingïakop kaba ïathaiñ bha; ka kynhun Rishot kaba na ka shnong Dongmihsngi, Jowai kala ïoh ïa ka nam jop bad ïa ka nam kaba ar la ïoh da ka kynhun na ka Chlem hikai Sur Tynre jong ka Seiñraid Mukhla bad ïa ka nam kaba hadien pat ka ïoh da ka kynhun MUS kaba na ka shnong Mustem.
U ma Kamai War uba long u nongïoh ïa ka nam Tirot Singh Award jong ka Sorkar Meghalaya; ula ïaroh ïa ki kynhun jong ki samla kiba la wan ban ïashim bynta ha kane ka jingïakop bad kyntu ïa ki ba kin nang pynjanai shuh shuh ïalade khang ba kin lah ban wanrah ïa ka burom ïaka jaidbynriew. Ia kane ka jingïakop rwai tynrai la pynïaid da u Habandajop Lyngdoh uba long u nongtrei hapoh ka seng SURE.
