Shillong, Jymmang 26: Ka Dorbar Ki Khlieh Nongsynshar ka Ri Hynniewtrep, kynthup ka Federation of Khasi States, Ki Sirdarship, bad kiwei kiwei kaba la ia kynduh ha ka 25 tarik May 2017, ha office Dorbar ha Shillong, ka la ia thir ia tai halor ka jingthmu ka Sorkar India ban pynbeit thymmai ia ka Sixth Scheduled ha kaba la thmu katkum ka kot ba la ioh lum ka “working draft” ban wanrah bad bsuh ia ki Village Council bad ki Municipal Councils hapoh ka Khyrnit Sixth Scheduled jong ka Ri India.
Ha kaba iadei bad kane ka phang ka Dorbar FKS ka la shim ia ka rai ban pynkynmaw bad dawa na ka Sorkar India ban nym bakla bad ban pyntreikam ia ki jingkular ki jingiateh kyndon ka Instrument of Accession and Annexed Agreement 17th August 1948 hapoh ka Article kaba kyrpang ha ka kyrdan 370 A ka Constitution Ri India, bad la rai ban phah ia ka Dorkhast pynkynmaw sha ka Sorkar India halor kane ka phang. Ka Dorbar ka la phah teng ia ka shithi sha ka seng BJP sha Delhi bad hapoh jylla Meghalaya hynrei haduh kine ki sngi kam don kano kano ka jubap na katei ka seng kaba synshar ha Delhi.
Shuh ka Dorbar Federation of Khasi States ka la pynpaw ia ka jingkyndit ban ioh pule ia ka jubap ka Sorkar India halor ka VAB, lyngba ka shithi tnad MHA kaba No. 11012/144/2015 NE:IV January 2016 bad ka Dorbar Federation of Khasi States ka pynpaw ka jingsngewsih halor ka jingsngap jar jar ki bor KHADC halor kane ka shithi kaba paw shai ia ka jingbym ithuh bad ka jingbympdiang ka Sorkar India ia ka nongrim ki Dorbar Shnong hapoh Ri Khasi namar katkum ka Sixth Scheduled ki la kwah ban wanrah da ki Village Council bad ki Municipal Councils ha ka nongrim “Adult Suffrage” bad ha kaba la hap ban pynrung ia ki “other tribes” bad “original inhabitants” hapoh kitei ki jingthaw thymmai.
Ka Dorbar FKS ka pynpaw ba katei ka shithi na ka MHA ka pynpaw shai ba ka Sixth Scheduled kam lah ban iada ia ngi ha kaba ia dei bad ki kyndon kyntien “adult suffrage”. Ka Dorbar FKS ka pynpaw ka la ioh pule ruh ia ka shithi January 2016 ba la phah na ka Sorkar Meghalaya sha ka Sorkar Delhi halor ka jingeh lada wanrah jubor ia ki Village Council bad ki Municipal Councils hapoh Meghalaya namar ki paidbah ki dang iai shaniah ha la ki Dorbar Synshar tynrai.
Ha ka juh ka por ka Dorbar FKS ka kyrpad ia ki bor ADC bad ia ka Sorkar Meghalaya ba kin wanrah da ka Resolution hapoh ki iing dorbar Assembly bad District Council halor ka Instrument of Accession and Annexed Agreement 17 August 1948.
Kum shibynta ban pynshai ia ki khun ki hajar ka Dorbar FKS ka la rai ruh ban kyntu ia baroh ki Hima/Elaka Khasi Jaintia ban lum Dorbar Hima ban pynshai ia u khun u hajar halor kane ka jingbym ithuh ka Sorkar India ia ki Dorbar Synshar Shnong, Dorbar Kur, Dorbar Raid bad Dorbar Hima.
Ban pynpaw biang sha ka Sorkar India ia ka jingangnud ki khun ki hajar halor ka Instrument of Accession and Annexed Agreement 17 August 1948, Ka Dorbar Federation of Khasi States ka la rai ruh ban lum da ka Dorbar Ri kaba San ha u bnai October 2017 bad ia ka jaka bad ka tarik yn sa pynbna hashen. Ha katei ka jingialang la don lang ki Syiem, Sirdar, Lyngdoh, Myntri, Rangbah Shnong bad kiwei kiwei ki riew rangbah.
