Shillong, Rymphang 02: Ka jingialang jong ka kabinet mynta ka sngi kala ai ia ka jingmynjur ban pynjlan ia ka samoi treikam jong ki artylli ki Autonomous District council kata ka Khasi Hills Autonomous District Council (KHADC) bad ka Jaintia Hills Autonomous District Council(JHADC) da hynriew bnai kaba mut ba ia ka election MDC ha kitei ki Artylli ki District Council yn ym pat ioh ban pynlong satia.
Ha ba kren sha ki ladpathai khubor na ka liang u bah Prestone Tynsong u ba dei u Symbut Myntri Rangbah u ba dei khmieh ia ka tnad District Council Affairs u la pyntip ba ka sorkar ka la ioh ia ka jingkyrpad na baroh artylli ki District council bad kumjuh ruh na ki Delimitation Committee ban pynjlan shwa ia ka samoi trei kam namar ba ki hap ban pynbeit shwa ia ki constituency.
U bah Prestone u la ong ruh ba ha dien ka jingbishar ia kane ka jingkyrpad na ka liang ka sorkar ka la rai ban pynjlan ia ka samoi trei kam da 6 bnai bad yn phah ia kane ka rai sha u Lat ka Jylla ban ioh ia ka jingmynjur bad ban pynmih ia ka jingpynbna.
Kum ban shu pynkynmaw ba ka samoi trei kam jong kine ki artylli ki District Councuil ka dei ba kan kut noh ha ka 4 tarik jong u bnai Lber 2024 mynta u snem bad na ka liang u bah Prestone u la ong ba kane ka jingpynjlan kan trei kam naduh ka 5 tarik jong u Lber na ka bynta 6 bnai.
Hakne ka jingialang na ka liang ka kynhun myntri ka la ioh ruh ban mynjur ia ka Meghalaya subordinate Service Rules 2024 ia ka ba la wanrah da ka tnad khlaw jong ka Sorkar Jylla.
La wan rah ruh ia ka Meghalaya Telecom Infrastructure Policy ha ka ba kane ka policy la pyntrei kam da ka Sorkar Pdeng, u Bah Prestone u la ong namar ba ki don ki kato katne ki jingpynkylla ha kane ka Policy da ka sorkar Pdeng kumta na ka liang ka Sorkar Jylla ka hap ban wan rah ia ki jingpynkylla kumta na ka liang ka kynhun myntri ka la pdiang ia kane ka jingwan rah jingkylla ha kane ka Policy.
U bah Prestone u la ong ruh bana ka liang ka Kynhun myntri ka la wan ruh ia ka program ha kaba iadei ban peit ia ka bha ka miat ki khynnah samla kata ka Meghalaya Program for Adolescent well being Empowerment and resilence ha ka ba yntip kum ka Empower.
haba ia dei bad kane u la ong ba ia kane yn peit da ka State Human Development Council ha ka yn khlieh da u Chief Minister ha kaba u Chief secretary yndei u Chairman, katba ha ki destrict ki Deputy Commissioner kin long kum ki khlieh ha ka ba iadei bad ka jingpyntrei kam ia kane ka project.
