Shillong, Jylliew 06: Ka Sorkar Jylla ha ka jingialang kynhun myntri ba la long mynta ka sngi ka la shim ia ka rai ban thung ia ka ”Search Committee”, ka ban wad ia ki riewshemphang ki ioh long dkhot ha ka Expert Committee ka ban shong bishar ia ka Reservation Policy ka jylla.
U Myntri Rangbah ka Jylla u Conrad K Sangma haba iakren bad ki lad pathai khubor hadien ka jingialang kynhun myntri u la pyntip ba “Ka kynhun Myntri ka la ai jingmynjur ia ka Search Committee, ba yn khlieh da u Chief Secretary ka jylla, ryngkat ar ngut ki heh ophisar na ka tnad Law & Personel”
U Conrad K Sangma u pyntip ruh ba ka Sorkar Jylla kan sa pynmih noh ruh ia ka Office Memorandum (OM) ba thymmai ha ba iadei bad ka jingpyntreikam ia ka Reservation Roster.
U Conrad K Sangma u la ong ba “Shisien ba la pynmih ia kane ka Office Memorandum, yn sa pyniaid noh shakhmat ia ka jingthungkam thungjam hapoh ka Jylla”.
Ha kane ka jingialang ka Kabinet kala pdiang ban don ia ka Chief Minister Solar Miniision kane ka long ban pynioh ia ka bor ding kaba khuid ha ki shnong ki thaw ha ki nongkyndong jong ka jylla.
