Shillong, Jylliew
18: Hadien ba la rai da Ka sorkar Jylla ban pynmih shuh Ki C&RD Block Office kynthup ia Ka Mawlai C&RD Block. La mih shibun ki jingiakren bad jingiapynpaw na kiba bun ki liang khamtam na Ki Seng Bhalang kiba don ha Mawlai bad Mawlai Town Durbar ruh. Halor kane ka bynta, U MLA Ka Mawlai Constituency U la khot ka jingialang ha Mawlai ha kaba la wan poi lang da Ki Nongkitkam Ka Mawlai Town Durbar, Ki Rangbah Shnong kiba ha Mawlai kynthup ia U Rangbah Ka Mawlai Mawtawar ruh, Ka Seng Samla Mawlai Pyllun bad ki nongmihkhmat na Ki Seng Bhalang kum HYC bad FKJGP ruh bad kiwei kiwei ruh ki nongshong Shnong ka Mawlai.
Ha kane ka jingialang la ioh ia ka jingpynshai halor ka jingiaid lynti U MLA Ka Mawlai naduh ba la rai ban don noh da sa ka Mawlai C&RD Block Office ia kaba ka la poi mynta kane ka kam ka la poi shaduh ka thong ban ia kynduh sa ia U Myntri Rangbah Dr. Mukul Sangma ha kane ka taiew kaba mynta ha ryngkat ka jingiadonlang Ki Nongkitkam Ka Mawlai Town Durbar, Rangbah Shnong Mawtawar, kiwei de ki Rangbah Shnong ha Mawlai, Ka Seng Samla Mawlai Pyllun, Ka HYC bad FKJGP Mawlai Circle bad kiwei kiwei de. U Bah Embhahlang Syiemlieh u la pynshai ruh ba u la dep ia kynduh ruh ia kiwei pat ki MLA kiba ka Constituency jong ki kan kynthuplang ha ka Mawlai C&RD Block bad ia U Bah Sngiawbhalang Dhar ruh uba long U Myntri Sorkar ba dei peit ia Ka Community & Rural Development.
Ha kane ka jingiakynduh ia U Myntri Rangbah Ka Jylla, la sngewthuh ba na ka liang Ka Sur Ki Paidbah Mawlai yn pynpaw shai kdar ba Ka Shnong Mawlai Mawtawar ka la dep pyn thikna ban ai ei ka jaka kaba don ha Mawlai Mawtawar hi ia kaba wat Ka Mawlai Town Durbar ruh ka la dep ai da ka shithi dang shen sha ka Office U Director C&RD, Meghalaya. Kumta hadien ka jingiatai sani bha kumba la pynpaw da U Secretary Ka Mawlai Durbar Town Durbar, Ki Rangbah Nongkitkam Shnong na Mawlai Mawiongrim, Mawlai Mawiong Umjapung, Mawlai Nongpdeng, Mawlai Nongkwar, Mawlai Mawtawar.
Ka Seng Samla Mawlai Pyllun bad kiwei kiwei de, ka Jingialang da kawei ka sur ka la rai ba ha ka sngi ban ia kynduh ia U Myntri Rangbah Dr. Mukul Sangma, yn ai ruh da ka shithi kaba long ka rai kaba mih mynta ka sngi ha kaba yn ia soilang da U MLA Mawlai, Mawlai Town Durbar bad U Rangbah Shnong Mawlai Mawtawar ba ka Office jong Ka Mawlai C&RD Block yn dei ban plie noh ha ka jaka ba al ai da ka Ka Shnong Mawlai Mawtawar.
