Jowai jylliew 3: Ka shnong ka Paduh kawei naki shnong kaba heh bad bad kaba la rim haka thain war Jaintia, kala shim iaka rai ban kyntiee iaka kam jngohkai pyrthei haka shnong. Kane ka rai ka dei kaba la mih naka Seminar Cum motivation on Tourism and Socio-economic development kaba la long haka 3 tarik u June 2014 haka community hall jong ka shnong Padu bah.
Haka jingialang ban plie ia kane ka Seminar la ioh iaka jingkren na u Het Pohthmi MDC uba la kyntu iaki paidbah ban iatreilang naka bynta ban kyntu iaka kam jngohkai pyrthei hapoh ka shnong.
Ha kane ka sngi la ioh iaka jingpyshai halor ka phang na u ma Philemon Lyngdoh uba long u President jong ka Jaintia Tourism and Environment Society uba la batai bniah halor ka phang bad kumno ka JTES kaba long ka seng kaba ju pynlong iaki Discover Jaintia kan lah ban iarap ha kaba pynurlong iaka thong jong ka shnong.
Hadien pat la ioh iaka jingkren na u Rev. H.H.Mohrmen uba la batai shaphang ki lad iohkam iohjam naka kam shangkai pyrthei bad kumjuh ki bynta kiba donkam kum ka shnong bad ka imlang sahlang kin leh naka bynta ban khring iaki nongwan jngohkai shaka shnong.
Ka shnong Padu ka dei kaba donbok ban don iaki lai tylli ki jingkieng jri (Living root bridge) hapoh ka shnong bad kumjuh ruh ka don iaki saw tylli ki kshaid ban oh rymphai kiba lah ban khring iaki nongwanjngohkai pyrthei.
Hadien ba ka shnong kala iohsngew iaki jingbatai kala rai da kawei ka jingmut ban kyntiew iaka kamjngohkai pyrthei haka shnong da kaba thung ruh iaka nongkitkam jong ka seng kaba khmih ia kane ka kam. La jied president ia u Bahshlur Mukhim, Vice President Neeta Mukhim, Secretary Shemphang Pohshna, Asst Secretary Ohiwot Mukhim, Treasurer Theriang Pohshna.
La jied ruh ia kine ban long ki Executive Member Goodluck Mukhim, Pohshna Dhar, Bestmi Khonglah, Maxius Pohshna, Rajan Mukhim, ka Dariakor Pohshna bad ka Embhah Mynteng.La jied ruh ia u Het Pohthmi MDC bad u S. Khlur Mukhim kum ki nongaibuid jong ka seng. Ia kane ka prokram la bei pisa daka ophis jong u District Planning Officer West Jaintia Hills District, Jowai.(SP News)
