Jowai, Naitung 18:Ka Rilum Social Welfare Organization (RSWO) ka la pynlong ia ka Jingialang, Seminar shaphang ka NPR bad Aadhaar Number ha ka 09/07/2016 ha ka Shnong Thymme, West Jaintia Hills bad la khot ia ka Meghalaya People Committee on Aadhaar (MPCA) ha kaba ki la ia wan na ki Shnong ba marjan kum ka Shnong Ksehrynshang, Moobakhon, Nongmulieh, Nongthymme, Krem Myrsiang bad kiwei ki shnong ba narjan.etc.
U Bah Augustar Jyrwa General Secretary KSU Seng Kmie, haba la pynshai halor ka jingktah ka NPR, kum ka jingplie lad ia ki mynder ri ban ioh kyrteng kum ki nongshongshnong hapoh ka ri bad ka jylla ha kaba u la iathuh ruh ba u myntri rangbah ka jylla u la iathuh ha Ïing Dorbar ba ki mynder ri hapoh shiphew snem naduh 2006 – 2015 ki long 26426 ngut bad ia ka Aadhaar la pyniasoh bad ka NPR namar kata kum ka Seng KSU ka pyrshah ban pynrung Aadhaar ne pynioh Aadhaar ryngkat bad ka NPR ha ka jingshisha kam dei ban pyniasoh ia ka NPR bad ka Aadhaar namar kan ktah ia ka jingbun briew ka jylla ha kaba ngi kum ka jaidbynriew ngi la duna paid, nalor kata i la pynpaw ruh ia ka jingpynrung Aadhaar ka ktah ia ka jinglong kyrpang jong ka jinglongbriew ha kaba baroh ngin ia long salonsar noh ym don shuh ka jinglong kyrpang shimet shimet.
La kyrpad ruh ia ki paidbah nongshong shnong kynthup ia ki nongsynshar shnong, nongialam niam ba kin da pyrkhat thew bad da woh shuwa ym ban liat ha ka jingpynbieij mit mit ki bor sorkar, hadien kata la ioh sa ka jingpynshai bad batai na u Rev. PBM Basaiawmoit halor ka jingsdang bad pyrkhat pynioh Aadhaar ia ki nongshongshnong ka ri, mar ia dep ka thma kargil 1999, bad tei tad ha ka snem 2009 ba la seng ia ka Unique Authority of India UAIDAI bad ba la ai kyrteng Aadhar da u Nandan Nilkani kaba mut ka nongrim.
u la kdew ruh shibun kiei kiei ki jingthmu ki jingsyntiat ia baroh ki nong India ryngkat bad kaba pynngat lyngba ki Shcemes pynroi paidbah, wat la ka Lok Sabha kaba la passed ia ka Bill shaphang u Aadhaar Number hynrei ka dang don ha ka kti ka Supreme Court ha kaba ka la ai ka rai ba shiteng por ba ia u Aadhaar Number ym dei ban pynbor iano iano nangta la shim ba u Aadhaar Number u long kum u Social Security No.
Kiba don sha kiwei pat ki ri ia kaba la kyntiat kum ka France, UK, Phillipine, Australia Etc ban don kum une u Social Security No., ngi pynpaw ia ka jingsngewburom ia ki nongshong shnong ka jylla Meghalaya bad Assam kiba duna tam eh ka jingdon Aadhaar ha ka Ri India baroh kawei, hadien jong kine ki jingkren da kawei ka sur la iakut ban ym pdiang ia u Aadhaar bad ban pynphriang paidbah ia kane ka jingiakut bad lada don kano kano ka jingpynbor ne shah kyntait ban ioh jingpyntoi scheme sorkar haba ym don aadhaar ki dei ban pan jingthoh na kita ki nongmaham la ki dei ki bor shnong bor sorkar bad kiwei kiwei ki bor bad ruh la kyrpad ia ka Sorkar ban thwet ia ki nongphah SMS pyntieng pynsmiej halor katei ka phang.
