Shillong, Jylliew 07: Kum shibynta ban rakhe ia ka World Environment Day ha ka 4th June 2016, Ka Shillong Archdocese Catholic Youth Movement Zone-V ha ryngkat ka jing ia treilang bad u Bah Banteidor Lyngdoh, MDC Mawkynrew Constituency la pynlong ia ka jingialang ha Pingwait Community Hall kaba hap hapoh jong ka Mawkynrew Constituency ha kaba la wan ban iashim bynta shitrhem da kiba bun ki khun samla jong ka Thain, ki long kmie long kpa bad kumjuh ruh ki hep kiba rit.
Na ka liang jong ka Shillong Archdocese Catholic Youth Movement Zone-V, la pynlong ruh ia ka jing thung dieng ha ki bynta jong ki sawdong sawkun kiba hap ha ka shnong Pingwait kum shibynta ban wanrah pat ia ka jing pyn jyrngam ia ka mariang ha kaba Ki Longshwa man shwa kila ai kylliang hangi ki long mynta ban pynneh pynsah bad ban tyngkai na ka bynta jong ki longdien.
Haba kren kum u Kongsan ha katei ka sngi na ka liang jong u Bah Banteidor Lyngdoh, MDC Mawkynrew Constituency uba long ruh ha kajuh ka por u Chairman jong ka Khasi Traditional Medicine Commission, kawei na ki shnat treikam hapoh jong ka Khasi Hills Autonomous District (Protection and Promotion of Khasi Traditional Medicine) Act, 2011 u la ai khublei kyrpang ia ki Nongialam bad Nongkitkam jong ka Shillong Archdocese Catholic Youth Movement Zone-V kiba la shim ia kane ka sienjam ban pyn sngewthuh paidbah ia ka jingdonkam ban pynneh pynsah ia ka Mei Mariang, ha kaba u la ong ba kum ka Jaitbynriew kaba Tip Briew Tip Blei naduh hyndai kulong u Khasi u ju niew kor bad khein kyntang eh ia ka Mariang dei na kata ka daw ba haduh kine ki sngi kiba mynta la ju ong bad pyn donkam da ka kyntien ‘MEI MARIANG’ kaba mut ka kmie kaba ai buin ai thiang, kaba ri ba sumar ia u Khun bynriew.
U Bah Banteidor u la ong ba kum u MDC bad kum u Chairman jong ka Khasi Traditional Medicine Commission, u la ong ba lyngba jong kane ka Commission ka don ka bynta kaba khraw ban iada, ban ri ban sumar bad ban pynneh pynsah ia kiba bun ki jing kyrkhu ia u Khun bynriew kiba u Blei u la ai hangi lyngba jong ka Mei Mariang, namar ka Mei Mariang ym tang ba ka ai buin ai thiang ia u khun bynriew lyngba ka bam ka dih hynrei ngim dei ban klet ba ki don kyrhai ki dawai kynbat kiba u khun bynriew u lah ban pyn donkam ha ka pang ka shitom, kumta u la ong ba kadei ka kamram jong ngi iwei pa iwei ban tyngkai ha kaba u la kyntu ba ngim dei ban lehkput ia ka Mei Mariang, namar ka don la ka jong ka Nongkylliang. Kyntang iawai na ka liang jong u Kongsan u la kyntu ia baroh ki Khun Samla, ki Longkmie long kpa bad ki Paidbah Nong Shong Shnong ba ki dei ban don ka jing ia treilang ha ki liang baroh khnang ba ki jing thmu babha baroh kin urlong.
Ia ka Jingialang la pyniaid da u Samla Teibor Bina, Spoke person jong ka Shillong Archdocese Catholic Youth Movement Zone-V, Kiwei pat kiba la ai jingkren ha katei ka sngi ki kynthup ia u Bah Cresen Lyngdoh, sordar Pingwait, Bah B.Kharbithai sordar Kharang, kong Evelyne Nonglyer, Secretary Shillong Archdocese Catholic Youth Movement Zone-V, La pynphuh pyn phieng shuh shuh ia ka programme da ka jing ia don ryngkat lang da u Bah Pynbiang Kshiar, President jong Ka Shillong Archdocese Catholic Youth Movement Zone-V.
