Shillong, Naiwieng 19: Ha ryngkat bad kiwei pat ki bynta jong ka Ri, ka NEIGRIHMS, Shillong ka la rakhe ia ka Vigilance Awareness Week naduh ka 10 tarik haduh ka 16 tarik u Naiwieng 2018. Ka phang pdeng mynta u snem ka dei “Eradicate corruption – Build a New India” ne “Rat dingkhong ia ka bamsap – thaw ia ka India ba thymmai”.
Ia ka jingsmai jong ka jinglong hok la pynbeit bad pyniaid ha kiba bun tylli ki sngi lynter khnang ba bun ki briew kin ioh ia shim bynta ha kane ka jingsmai. Ha ka sngi ka banyngkong, ia ka jingsmai la shim da u Director, u Prof (Dr.) D. M. Thappa, u Bah David T. Umdor (Deputy Director), bad ki nongtrei jong ka Administrative Block.
Ha ka sngi ka baar pat, ia ka jingsmai la shim biang da u Director, u Prof (Dr.) D. M. Thappa bad ki doctor bad ki nurse jong ka Hospital. Ha ki sngi ki ba bud pat, ia ki jingsmai bad ka awareness programme la pynbeit bad pyniaid da u Vigilance Officer ka NEIGRIHMS, u Prof(Dr.) P. Bhattacharya na ka bynta ki khynnah pule MBBS, khynnah pule Nurse bad ki nongtrei nurse. La don ruh ka jingiakob thoh esse halor ka phang, ka skit bad jingiakob dro dur poster ha kane ka programme kaba la neh baroh shitaiew.
Ia ki syrnod bad ki buskit la sam ruh sha ki nongjop ha ka kyrdan banyngkong, baar bad balai ia kaba ai da u Director, u Vigilance Officer, u Dean bad u Deputy Director jong ka NEIGRIHMS ha ka 16 tarik u Naiwieng. Ki khynnah pule Nurse jong ka NEIGRIHMS ki la khur ia kiba kham bun na ki buskit jingjop.
U Prof (Dr.) D. M. Thappa, Director ha ka jingkren jong u, u la ong ba uwei pa uwei u nongshong shnong u dei ban husiar bha shaphang ki kam bamsap kiba don ha ka imlang sahlang bad ki kynhun treikam ki donkam ban don ka jingiada kaba khlain, ka jingiasnoh kti lang bad ka lad ka lynti ban pynshitom khnang ba ia kano kano ka jingbamsap lah ban wanrah sha ka jingkut ka ba shongnia, ban pynlong ia ka Ri India ban lait na ka jingbamsap.
