Shillong, Lber 12: Mynta ka sngi ka iing dorbar jong ka KHADC kala pdiang ia ka Bill jong ka Hima Khyrim Syiemship ha kaba ia dei bad ka jingjied ia u Syiem, Syiem Khynnah, kiba khraw batri jong ka hima, ki sordar bad ki rangbah shnong hapoh jong ka Hima ia kaba la wanrah da u Deputy CEM ban Pynshngian N Syiem ba dei peit ia ka tnad Elaka.
U Bah Pynshngian haba wanrah ia ka Bill, “The Khasi Hills Autonomous District (Nomination, Succession and Election of Syiem, Deputy Syiem, Lyngskor, Bakhraw, Longsan, Mansan, Shnat Raid, Rangbah Shnong Or Sordar Shnong and Administration of Khyrim Syiemship) Bill, 2024, la bshuh lang ia ka jingpynkylla ha ka bill bala wanrah ha ka iing dorbar.
Halor kane ka Bill na ka liang jong u bah Martle N Mukhim u la wan rah ia ka jingkylla ha katei ka Bill, ha kaba u la ai khublei ia ka EC kaba la wan rah ia kane ka bill ban pyniaid beit iaid ryntih ia ka hima namar u dei u khun u hajar jong ka Hima Khyrim hynrei ki dang don ki jingduna ha ka Bill.
La ong ba ki don kiba ka hima kala pyniaid ryntih hapoh kane ka hima kam shym don ha kane ka Bill, kumta um kwah ban weng ia kaei kaba ka hima kala but ryntih mynta pateng pateng, ha kane ka Bill dei ban kdew ban pynneh pynsah.
Halor kane na ka liang jong u Deputy CEM u bah Pynshngian u la ong ba ia ki kyndon kiba la wan rah da u dkhot ka iing dorbar ka EC kala pynrung lyngba ka jingpynbeit kaba thymai ia ka Bill bad kane ka jingpynbeit ka long kum bala kwah da u dkhot ka iing dorbar.
Na ka liang jong u Deputy CEM ba dei peit ia ka tnad Elaka u la kyntu ia u MDC ka Mawkynrew ba weng noh ia ka kane ka jingwanrah ia ka jingpynkylla namar kane ka bill la pdiang da ka iing dorbar ha u snem 2018 hynrei ka khot biang ia kane ka bill la bad, ha dien bala ioh ia ka jingkular na u Deputy CEM u bah Martle N Mukhim u la weng ia ka jingkwah pynkylla bad ha iing dorbar kala pdiang ia kane ka Bills.
