Mairang, Rymphang 15: Kum ka dak jong ka jingithuh bad jingai mynsiem ia ka jingtrei shitom bad jinglenlade jong ki ASHA Facilitator bad ki nongtrei ASHA ha ka jingiakhun pyrshah ia ka khlam COVID-19.
Ha kane ka sngi u Lamphang ka iing dorbar thaw ain ka jylla uba long ruh u MLA ka thain, u Bah Metbah Lyngdoh mynta ka sngi u la pynkupburom ia ki ha ka prokram ba la pynlong ha Madan Mot Tirot, Mairang Mission, Mairang.
Ha kane ka sngi la don ryngkat ruh u myntri ka tnat pynneh um ka jylla uba long ruh u MLA ka Mawthadraishan, u Bah Brolding Nongsiej , u Deputy Commissioner ka Eastern West Khasi Hills District, u Bah W. Nongsiej, u Superintendent of Police ka District, u Bah Maxwell B. Syiem.
Na ka liang jong ka hima la don lang u Syiem ka Hima Nongkhlaw, u Paiem P. M Syiemlieh, ki khlieh nongsynshar , ki nongtrei ka tnat ka koit ka khiah, ki ASHA, ki nonghikai, ki khynnah pule bad kiwei de.
Ha kane ka prokram la sakhi ruh ia ka jingsam ia ki Tablet PC na ka skhim Chief Minister’s Digital Learning Aid ( MTAB) Scheme sha ki khynnah pule jong ki 10 tylli ki jaka pule ka distrik da u kongsan bad kiwei de ki kynrem ki lyndan kiba la don lang ha kane ka prokram.
Ha ka jingkren jong u kum u kongsan, u Lamphang ka iing dorbar thaw ain ka jylla uba long ruh u MLA ka thain, u Bah Metbah Lyngdoh, haba pynpaw ia ka jingkmen ka jong u ban iadon bynta bad kane ka prokram.
U Lamphang ka iing dorbar bah Metbah Lyngdoh ba dei ruh u MLA kane ka jaka u la kyntu ia ki khynnah pule ba kin shim kabu bad pyndonkam hok ia ka teknoloji namar ka don haka ia ki atiar ban iarap ia ki ha ka jingpule jong ki kaba man ka sngi bad u la ban ruh ba ki dei ban pyndonkam pura ia kiei kiei kiba bha kiba ka teknoloji ka don ban ai bad ban kiar na kiei kiei kiba sniew kiba don ha ka.
Haba kren halor ka jingtrei shitom jong ki nongtrei ka tnat ka koit ka khiah kynthup ia ki ASHA naduh ba sdang jong ka khlam COVID-19 bad haduh kine ki sngi ba mynta, u Bah Metbah u la ong ba ki ASHA ki long ki rishot jong ka tnat ka koit ka khiah.
Ki ASHA ki don ka bynta kaba khraw ban pynsngewthuh bad pynshai sha ki nongshongshnong ha ki shnong ki thaw halor kiba bun ki prokram jong ka tnat ka koit ka khiah jong ka sorkar kiba kynthup ia ka jingai injek ba har rukom bad khamtam eh halor ka jingai tika iada COVID-19.
Ha kane ka sngi, la ioh ban pynkupburom ia 10 ngut ki ASHA Facilitator bad 134 ngut ki nongtrei ASHA, katba 887 ngut ki khynnah pule kila iohpdiang ia ki Tablet PC na ka skim Chief Minister’s Digital Learning Aid (MTAB) Scheme.
