Shillong, Naitung 13: Ka Thma U Rangli Juki ka dawa ba dei ban sangeh noh shi syndon ia ka jingtih Uranium ha ka Jylla bad ka iasnoh kti lang bad ki Seng, ki Kynhun bad ki nongshong shnong ka thain South West bad West Khasi Hills District kiba iakhih bad iakhun ban pynsangeh ia ka jingtih Uranium
Ka long kaba khia shibun, nalor ba kum ki nongshong shnong ngi la mad bad iakynduh ia ki jingeh, ki jingma bad jingmynsaw kiba mih na ka daw ka jingtih bad jingkhynra pathar ia kiwei pat ki marpohkhyndew kum u mawiong, mawshun bad kiwei, kiba la pynjot ia ka mariang bad ktah jur ia ka jingim briew. Mynta kumne ngi ia tyngkhuh khohsiew sa bat ka ishu kaba iadei bad ka jingtih ia u Uranium, u marpoh khyndew uba ma bad ba mynsaw tam. Ym lah ban len ia ka jingshisha ba ki riewstad scientist ki la dep jurip bniah da ka stad saian bad ki la lum thup ia ki jingshem jong ki kiba pynpaw shai kdar ia ki jingma, ki jingmynsaw bad ki jingpang kiba shyrkhei kiba mih na ka daw ka jingtih ia U Uranium bad kiba ktah ia ka mariang bad ia ka jingim briew.
Ka ishu Uranium kam dei shuh kaba thymmai, ki nongshong shnong jong ka thain ba don une u marpoh khyndew bad kiwei de ki nongshong shnong ka Jylla ki la ieng pyrshah ia ka jingthmu ka UCIL ban tih ia u Uranium. Naduh ba sdang ki nongshong shnong ka thain Domiasiat bad ki shnong kiba marjan ki la pyrshah jur halor ka jingthmu ka UCIL ban tih ia u Uranium bad ruh ban buh ia ka shlem ban sain ia une u maw Uranium ha Mawthabah. Lah ban pynkynmaw ba ha ka 12 July 2007 la pynlong ruh ia ka Public Hearing bad ha kane ka Public Hearing ki nongshong shnong ki la pynpaw ia ka jingsngew syier jong ki bad ki la pyrshah ia ka jingthmu jong ka UCIL ban tih ia u Maw Uranium.
Kumba ka paw mynta ka UCIL bad ki tnat treikam ka Sorkar India kiba peit ia ki kam Nuclear Energy (Bor Nukliar) bad kiwei kiba iasoh lang kim shym la burom ia ka sur jong u paidbah jong ka thain Domsiasiat, Mawthabah bad kiwei bad kim niew kor ruh ia ka sur jong ki nongshong shnong ka Jylla. Lyngba kine ki snem ki pyrshang pynban da kiwei pat ki lad ki lynti bad ki buit sianti ban thied bad pynthamme ne pynshoh bieij ia ki paidbah bad ki pyrshang ruh ban pynsngewthuh bakla ba lada ki trai shnong kim ai ka jingmynjur bad ki iai pyrshah kin ym lah ban ioh ia ka roi ka par bad kin sahdien sah. Ha Kane ka rukom ki pyntieng pynsmiej ia ki paidbah bad ki trai shnong bad kane ka long pyrshah ia ka riti shynshar paidbah.
Ryngkat bad kiwei pat, ka TUR ka pyrshah jur ia ka jingtyrwa ka Sorkar India lane Meghalaya ban shna ia ka surok bah ka ban pyniasnoh ia ka Nongstoin bad Wahkaji ha kaba ha ki kot ki sla jong ka Sorkar India ka la kren shai ba kane ka surok ka dei na ka bynta ban tih ia u maw Uranium. Niuma, ki nongshong shnong bad ki para ri jong ka thain Domiasiat, Mawthabah bad ka South West bad West Khasi Hills hi baroh kawei ki donkam mar dor ia ka roi ka par, tangba ym dei pat ban ia pyniasnoh ia ka roi ka par bad u Uranium. Ka roi ka par, kum ka koit ka khiah, ki surok ki lynti syngkien, ka bor ding elektrik, ka umbam umdih, ka pule dangle, ka rep ka riang, ka trei ka ktah bad kiwei ki dei ki hok bad nongkynti jong ki nongshong shnong jong ka thain bad ka Jylla. Ka dei ka kamram bad jingkitkhlieh jong ka Sorkar India bad Jylla ban pynbiang bad ai ia kine ki hok ha ki nongshong shnong. Lada ka Sorkar India bad Jylla ki don ia ka por bad tyngka ban pyllut ha kaba pyntieng, pynsyier bad pynbieij ia ki paidbah, balei ka Sorkar kam pynlut ia ka por bad ka spah jong ka ha kiwei pat ki kam pynroi kum ha kaba shna ia ki kor ki bor ban pynmih bording na ka lyer bad na ka sngi, kiba long ruh ki rukom pynmih bor ding kiba khuid bad ki bym ktah ia ka mariang.
Ka TUR ka pynrem ruh halor ka jingkren u Myntri Rangbah ka Jylla uba pynsngew ba kane ka jingeh kaba mih na ka kam tih Uranium ka dei ka ishu kaba ktah tang ia ka shong suk shong shngian jong ka Jylla. Kane ka pynpaw ia ka jingkhein sting bad ka jingleh bymsuidniew ia ki jingeh jong ki nongshong shnong.
Ka TUR ka sngewkhia shibun halor ka jingsngap jar ne leh bymsuid niew jong ki Nongialam sain pyrthei bad ki Seng Sain hima halor kane ka ishu. Ka sngewlyngngoh ruh halor ka khubor kaba mih ba kawei na ki seng sain hima kum ka UDP kaba pan pynban ia ka White Paper na ka Sorkar halor ka jingtih Uranium lane ka pan jingpynshai da ka jingthoh na ka Sorkar. Ka White Paper ne ka jingai jingmut jong ka NPP ruh ba ka Sorkar ka dei ban pynshai paidbah shuwa bad ban shim ka jing mynjur jong u paidbah halor kane ka jingtih uranium kam shong nia namar ka jingshisha halor ka jingma kaba mih naka jingtih uranium lah tip shai lypa na ki khubor kylleng pyrthei.
Kine ki jingaijingmut jong kine ki seng sain pyrthei ki long ki bym shong nia bad bym lah satia ban iada ia ki briew bad ia ka mariang na ka bih bad ki jingpang ne ki jingmynsaw kiba shyrkhei kiba mih na ka jingtih ia u maw Uranium. Ha ka jingshisha ki nongshong shnong ki kwah ban tip kaei ka jingpyrkhat jong ki seng sain hima bad hangno ki ieng halor kane ka ishu tih maw Uranium? Ka long kaei kaei ka bym lah ban pdiang ba ki seng sain Hima Kin shu rieh tngen kum ha kitei ki jingong. Kane ka long katkum ka khubor kaba la phah da ka TUR.
