Shillong, Lber 02: U Bah Sanbor Shullai, MLA u ba dei ruh u president jong ka seng NCP u la ong ba ka sorkar kala dep ban thung ia ka committee, ha kaba u Bah DD Lapang u long u Chairman jong kane ka Committee ban jurip ia ki jaka ha kane ka nongbah Shillong, kino ki jaka kiba la thied da ka sorkar, kiba la thied da ki shipai bad kiba dei jong ki kur da kaba shim ia u snem 1863 kum u snem sdang.
U Bah Sanbor u la kynnoh ba ka sorkar kam shym la shim khia ia kane ka kam dei na kane ka daw ba ki shipai ki ioh ban leh katba mon, kiba pyrshah ia kane ka jingkyntur pud jong ki shipai mynta dei u paidbah, na ka liang jong kum u MLA u la ujor ia kane ka kam sha u Deputy Commissioner jong ka East Khasi Hills District, halor ka jingbeteng jong ki shipai ban kyntur pud ha Lawsohtun.
U Bah Sanbor u la ong ba ha u snem 2005 kala don ka jingujor hapoh jong Guwahati High Court ha u tei u snem bad ka High Court kala ai ia ka rai ha kaba ia dei bad kane ka kam, hynrei namar ba ka sorkar kam shym leh ei ei mynta shitaiew ki shipai kila sdang ban ker kynroh biang ha Lawsohtun jan jongka Sericulture jong ka sorkar pdeng.
Haba ia dei bad kane ka kam ka seng kan sa pyntip sha ki nongialam jong ka seng ha kaba kin ia kren ia kane ka kam bad u myntri jong ka sorkar pdeng ba dei peit ia ki kam iada Ri. U Bah Sanbor u la ong ba ka Lawsohtun ka don haduh hynniew tylli ki tyllong um kiba ai um ia kane ka nongbah Shillong bad lada ym lah ban iada na kane kajingklun jaka jubor jong ki shipai kan poi ka por ba ki paidbah kin sa shim jingeh ha ka liang ka umbam umdih.
Ha kane ka jingialang kaba u la khot mynta ka sngi ha MLA Hostel ia ki heh jong ka tand PHE, jong ka Shillong Cantonment Board (SCB) ha kaba la wan ban mih khmat langki wards commissioner kila shim ia ka rai ba ka SCB bad ka PHE kin ai ia ka kaiphot hapoh ka shiphew sngi ha kaba ia dei bad ka Um bad lada kimlah yn mudui da ka PIL hapoh iing bishar.
Ka SCB bad kum juh ka PHE ka shim ia ka khajana Um na ki paidbah bad haba ka shim ia ka khajana ka dei ban pynbiang ruh ia ka Um yn lah ban long ban shim tang ka pisa ia ka um pat khlem pynbiang.
