Jowai, Naitung 06: Ka Jaintia Marginal Coal Miners and Owners Association (JMCM&OA), ka wei na ka seng kaba peit ia ka bha ka miat jong ki para nongtrei bad bylla dewiong ba ba rit ba ria jong ka Ri Lum Jaintia, ha kane sngi Saitjain ba la dep ka la phah ia ka dorkhast jong ka sha u Myntri Rangbah Duh jong ka Ri India, u Narendra Modi ban pynpaw ia ki jingeh kiba ki paidbah nongtrei bad bylla dewiong ki la ia kynduh na ka daw jong ka hukum khang tih bad khaii dewiong ba jyndat jong ka NGT ha ka jylla Meghalaya bad ruh ban kyrpat ia u ban tuklar lem halor katei ka hukum jong ka NGT.
Ka JMCM&OA, ha ka dorkhast jongka kaba ka la phah sha u Prime Minister jong ka Ri India, ka la pyntip sha u halor ka jingshah ktah jur jong ki phew phew hajar ngut ki nongshnong shnong jong ka Jaintia Hills kiba im kyndoi jakpoh na kaba bylla dewiong da ka ba kylla long sakmai mynta khlem kam khlem jam na ka daw jong katei ka hukum jong ka NGT.
Bun na ki long ing long sem ba duk jongka Jaintia Hills kiba im kyndoi jakpoh na ka kam bylla dewiong mynta ki la sdang ban shah thngan. Ynnai ia kren ia ka jingkordit jong ki ha ka por ba pang ba shitom bad ba don ki jingdon kam ba kyrkieh kum ha ka jingpang jingshitom bynrap shuh shuh ka JMCM&OA ha ka dorkhast jong ka sha u Myntri Rangbah Duh jong ka Ri India.
Katei ka seng, ka la pyntip ruh sha u Myntri Rangbah Duh jong ka Ri India lynba katei ka dorkhast jong ka ba lada kane ka hukum jong ka NGT kan dang iai bteng kumne sa katto katne por, ka por kan sa poi ha kaba ka jingiapkhlam ba shyrkhei jong ka jingshah thngan kan sa wan lynshop ha ki phew phew hajar ngut ki nongshongshnong jong ka Jaintia Hills.
Ka JMCM&OA ka la ong shuh shuh ha ka dorkhast jong ka ba ka por kan sa poi bad ka la sdang mynta ha kaba kito baroh kiba la shah ktah na katei ka hukum jong ka NGT, ban pyndap ia la ka ja kpoh bad ia ki jingdonkam jong ka iing ka sem, kim ban se ban leh ia ki kam sniew ba har rukom kum ka jingtuh, ka jingthiem, ka jinglute bad jingpyniap briew tang ban ioh pyndap la ka jakpoh.
Katei ka seng jong ki nongtrai dewiong, ka la ong shuh shuh ia u Myntri Rangbah Duh ba kaba kham ma shuh shuh ka long ba lada jia ba kane ka hukum jong ka NGT kan dang iai bteng, ka por kan sa poi ruh ha kaba ioh lehse kiba bun ki nongshongshnong jong Jaintia Hills kin sa shah ialam bakla noh da kaba rung sha ki kam pyntriem kum ha ki kam Kai Khlaw bad kiwei kiwei de bad ynda kane kan jia, kane, kan sa ktah ia ka shong suk shong sain ha ka imlang ka sahlang ha ka thain baroh kawei.
Nalor kitei ki jingkdew ha ka dorkhast jong katei ka seng sha u Myntri Rangbah Duh jong ka Ri India, katei ka seng ka la kyrpad jur ruh ia u, ba un tuklar lem ia katei ka hukum jong ka NGT da ka ba thaw ia ki lad ki lynti ban pynbor ia ka NGT ban weng noh ia katei ka hukum jong ka na ka jylla Meghalaya bad ruh ka seng ka la kyrpad ruh ia u Myntri Rangbah Duh ban pynduh noh ia ka NGT ha Meghalaya namar ka jylla Meghalaya ka hap hapoh ka jingkdup jong ka Sixth Scheduled jong ka Constitution jong ka Ri India ha kaba ki briew kiba im ba shong ha sah ha ka ki dei ki paid riew lum ba rit paid, kiba dang sah dien ha baroh ki liang bad ruh ba ka rukom bat khyndew bad shyiap bad ka riti dustur ka iapher na kiwei pat ki bynta jong ka Ri India. Kane ka long kat kum u kyrwoh khubor ba la pyllait da u L Deibormi Rymbai President bad u H Deolangki Dkhar General Secretary jong ka JMCM&OA.
Ha kajuh ka por ka JMCM&OA ka la phah ruh ia kane ka juh ka dorkhast sha u Union Coal Minister jong ka Ri India, u Piyush Goyal.(SP News)
