Shillong, Iaiong 15: Mynta ka sngi u wei nonghikai skul shynrang jong ka JNV School Nongstoin West Khasi Hills District u la shah beh kam syndon halor ka jingkynnoh ba u la jrong kti ia ki khynnah skul kynthei jong kane ka skul.
U Deputy Commissioner jong ka West Khasi Hills District u Arunkumar Kemphavi, u ba dei ruh u Chairman jong kane ka skul, haba kren ha u SP News Agency u la iathuh ba la beh kam ia u ne u nonghkai ha dien ba ka Committee kaba thung ban tohkit kala shem ba ka don ka jingleh kynshlein na ka liang jong u nonghikai ia ki khynnah skul kynthei.
Na ka liang jong ka ophis jong u Deputy Commissioner jong ka West Khasi Hills District kala ai ka jingbethah ia ka JNV Samiti Shillong ba kan ai da ka jingujor pyrshah ia u tei u nonghikai hapoh jong ka kyndon ain jong ka Protection of Children from Sexual Offenses Act (POCSO), 2012.
La ong ba haba u la leit ban jurip ia kane ka skul kum u Chairman, la don ki khynnah kynthei kiba shlur kila wan sha khmat ban iathuh ia ka jingleh jong u tei u nonghikai, halor kane ka jingujor la thung ia ka kynhun tohkit kaba kynthup ia u Extra Assistant Commissioner, District Social Welfare Officer bad Deputy Labour commissioner, West Khasi Hills district bad kane ka committee kala shem ba kala don ka jingleh kynshlein na ka jong u nonghikai ia ki khynnah.
Na ka liang jong u Chairman jong ka skul u la ong ba kane ka long ka jingmaham ia baroh ia kito kiba thmu ban ong ba kin lait na ka kti jong ka ain wat la kila leh bakla pyrshah ia ki khynnah kynthei. Na ka liang jong DC u la ong ba lada don shuh kiba shah leh ha kane ka rukom ki dei ban mih sha khmat ban iathuh bad na ka liang jong ka ophis ka don ban iarap.
