Shillong, Nailar 16: Ka FKJGP Sengkmie kum shibynta ban pynjanai bad ban pynkhlain shuh shuh ia ka rukom treikam jong ka Seng ha ka 16th August 2016 ki Nongialam ba hakmat eh jong ka Sengkmie kiba kynthup ia u Bah Dundee Cliff Khongsit General Secretary bad u Bah Kitboklang Nongphlang Education Secretary ha ryngkat ka jing synran lang da ki Nongialam jong ka FKJGP East Khasi Hills District naduh u Bah Elton Warjri President lem bad kiwei pat ki para dkhot jong ka District ki la hiar sha ki Thain Mawsynram ban pynlong ia ka jingialang ha Rit Mawksir Café, Mawlaidong, Mawsynram.
Ha katei ka jingialang la wan ban ia shim bynta shit rhem da ki spah ngut ki khun samla jong ka Thain kiba sharum jong ka shnong Mawsynram ter ter shaduh ki bynta jong ki Shnong Khappud Border Area.
Hashwa ban ioh ia ka jing pynskhem ia ki Nongkitkam jong ka tnat treikam kaba thymmai jong ka FKJGP ia kaba la tip kyrteng kum ka FKJGP South East Khasi Border Circle, la ioh shwa ia ka jing kren ai mynsiem na u Bah Rangsan Sohmat Rangbah Shnong Phlangwanbroi bad n aka liang jong u Bah Bording Marbaniang Rangbah Shnong Dongshiliang Mawsynram ki ba pynpaw ia ka jing sngew kmen bad ka jing sngew shngain lyngba ka jing wan pyn iasoh jong kiba bun bah ki khun samla jong ka thain hapoh ka Lama jong ka FKJGP kaba dei shisha ka seng kaba la ih ha ka pyrkhat pyrdain bad kaba long ruh ka seng kaba don ia ka jing iohi jngai ban saindur ia ka lawei jong ka jaitbynriew ha kaba ki la pyn paw ban a ka liang jong ki kum ki Nong Synshar shnong ki long kiba kloi ban ia treilang bad ki Nongialam jong ka FKJGP South East Khasi Border Circle la ka long ha kano kano ruh ka por.
Haba kren ha ka jingialang ha katei ka sngi na ka liang jong u Samla Kitboklang Nongphlang Education Secretary FKJGP Central Body u la ong ba kum ki Nongialam jong ka Sengkmie kala don ka jingiamir jingmut bad ka jing iathir sani bha halor kane ka bynta la jan don kumba shisnem ban pynkhlain ia ka rukom treikam jong ka Seng khamtam eh sha ki bynta jong ki Shnong kiba don ha ki jaka Khappud, hynrei kum ka seng kaba la rangbah ha ka sainpyrkhat ngim kwah ban leh kyrkieh ban Thaw ia ka tnat treikam jong ka FKJGP South East Khasi Border Circle ha kito ki khyndiat por lymda ngim pat iohi ia ka jing thrang bad ka jing nangnud ba naduh mynsiem jong ki khun dap shynrang kiba kloi ban aiti met bad mynsiem ban shakri ia ka jaitbynriew lyngba jong ka FKJGP, hynrei ha kane ka kynti kaba mynta haba ngi la iohi shai ia ka mynsiem kitkhlieh jong phi ki khun samla jong ka thain na ka liang jong ka Sengkmie ruh ka la kloi ban ai lem ia ka kti ka mon ka kti ka diang haphi ki khun samla ban long ki Nongbah Tympha ban ia kit lem ia kane ka lyngkor kaba khia ban shari ia ka Jaitbynriew.
Ha kawei pat ka liang u Bah Dundee Cliff Khongsit General Secretary FKJGP Central Body u la pynkynmaw ba ki Dkhot jong ka FKJGP South East Khasi Border Circle ki dei ban ri kyndong ia ka akor ka burom bad ban kynmaw dngong ia ki lai tylli ki mawbyrsiew kiba la shon shap ha ka jingmut jong ka kyntiem phira (Motto) jong ka seng ba kin ialeh kat lah kat iai ban pynurlong ia ka jing angnud ban wanrah ia ka jing kylla ha ka imlang ka sahlang, ka ioh ka kot bad ka jingkylla ha ka synshar ka khadar.
Ha kane ka sngi la pynskhem ia ki nongkit kam ba thymmai jong ka seng FKJGP jong ka thain Mawsynram, Bah Phylliewstar Lartang kum u president, Bah Kyrmenskhem Shangdiar bad Bah Klining Dewsaw kum ki Vice President bad u Bah Kenesjune Nonglait kum u General Secretary bad u Bah Helessing Syiemlieh bad u Bah Artis Kharbisnop kum ki Assistant secretary, u Bah Sengborlang Syiemlieh u nongsam khubor jong ka seng la jied ruh ia kiwei kiwei ki nongkit kam ha kane ka sngi ha kaba la pynskhem ia ki da u Bah Elton Warjri president jong ka East KHasi Hills District.
Nalor jong kitei ki Office Bearers jong ka FKJGP South East Khasi Border Circle la ioh ruh ban pynskhem haduh 30 ngut ki Dkhot jong ka Executive Committee. Ia ka jingialang ha katei ka sngi la pyniaid da u Bah Elton Cliff Warjri, President FKJGP East Khasi Hills District, ha kaba la pynskhem ia baroh ki Nongkitkam da u Bah Dundee Cliff Khongsit General Secretary FKJGP Central Body bad la ioh ruh ia ka jing kren ai khublei n aka liang jong u Bah Phylliewstar Lartang, President FKJGP South East Khasi Border Circle.
