Shillong, Nailar 26: U Superintendent ki pulit jong ka East Khasi hills District u la iathuh ba mynta ka sngi katba ki pulit ki dang wan phai na ka kam na shnong Lawmei ki pulit kiba don hapoh ka kali Gypsy kila shah kawang Petrol bom ha lynti ha Mawlyndep jong ka Ri Bhoi District.
Katkum ka khubor kaba la pynlait mynta ka sngi na ka tnad pulit la iathuh ba 25/08/2020 ka seng ki nongrep bad ki nongkhaii jhur kila don ka jingialang bad u BDO jong ka Sohiong ha kaba ia dei bad ka jingwan ki kali kit jhur na Assam.
Haba ia dei bad kane ki pulit kila leit ban pahara ia katei ka jaka bad ki pulit kiba don ha katei ka por ki long u wei u ba dei ABSI na ka kynhun pulit SF-10, 3 ngut ki pulit SF-10 bad u nongniah ia ka kali pulit.
Haba kine ki pulit kila wan phai ryngkat ki kali kit jhur na Assam kala dong ka jingshah kawang petrol bom bad kawang maw ia ka kali Gypsy kaba don ia u Number ML-02-0198 ha Mawlyndep kaba hap hapoh jong ka Ri Bhoi District.
Ha kane ka jingjia ar ngut ki pulit kila mynsaw na ka jingthang ka ding bad la rah ia ki sha Civil Hospital ban phah sumar bad lai ngut kiwei pat la pynlait noh ha dien ba la sumar ia ki.
Ki pulit SOT ba don ha Umiam mar ia ioh jingtip ia kane ka jingjia kila leit sha katei ka jaka ban thewt ia kine ki nongleh kam sniew na katei ka jaka la ioh ban tam ia ki bilor kiba la pyndon kam ban shna petrol bom bad ia kiba khlem pat pyndon kam bad kum juh ka petrol ha ki plastic.
Na ka liang jong ki pulit kila registet ia ka mukotduma bad ka Umiam Police station hapoh ki kyndon ain jong ka IPC bad kum juh hapoh ki kyndon ain MMPDO. Na ka liang jong ki pulit ki dang thwet ia kine ki nongleh kam sniew.
