Tura, Iaiong 03: Ka Pawan Hans Limited mynta ka sngi ka la pynshai halor ka jingkynnoh jong ka seng sain pyrthei ka National People’s Party, kaba ong ba u myntri rangbah ka jylla u Dr Mukul Sangma u la pyndonkam bakla ia ka helicopter.
U General Manager ka Pawan Hans Limited, u Sanjay Kumar ha ka shithi kaba u la thoh sha u returning officer u Pravin Bakshi ba dei peit ia ka 2 –Tura LS u la batai ba ia ka “Dauphin N3 helicopter” la ai sha ka Meghalaya Congress committee ban kit ia ki passenger ha ki jaka bapher ba pher hadien ba la ioh ai ia ka jingsiew.
Ka National People’s Party ka la ujor bad ka election commission pyrshah ia u Dr Mukul da kaba kynnoh ba u la pyndonkam bakla ia ka helicopter paidbah na ka bynta ban kit ia u bad ia u kyrtong ka seng Congress Daryl William Momin. Ka NPP ka ong ba kane ka jingleh kala pynkhein ia ka model code of conduct.
Ia kane ka helicopter la pyndonkam naduh ka 25 tarik Lber haduh ka 1 tarik u Iaiong da u myntri rangbah u Dr Mukul.
U Kumar u la ong ba ia ka helicopter la ai sha ka Meghalaya Congress committee hadien ba ka la ioh ia ka NOC na ka Meghalaya Transport Corporation ba ki la pynsangeh noh shwa ia ka jingshimwai ia ka helicopter.
Ka Meghalaya Transport Corporation ha ka shithi ba ka la phah sha u returning officer jong ka 2-Tura parliamentary seat ka la batai ba ka sorkar Meghalaya ka la ai ia ka NOC sah ka Pawan Hans ban pynsangeh ia ka jingshimwai bad mynta ka shong ha ka Pawan Han ban pyndonkam ia ka da kaba buh kyndon ba kim dei ban pan bai wai ei ei ha kane ka por ba ka sorkar kam shym la shim wai.
Ka dei tang ka Pawan Hans helicopter kaba pyndonkam na ka bynta ka leit ka wan jong u paidbah ia kaba la pyniaid da ka sorkar lyngba ka Meghalaya Transport Corporation bad ban pyndonkam mynta tang na ka bynta ban kit ia u myntri rangbah na ka bynta ban leit ia lap election ha ki bynta bapher bapher ha Garo Hills ka dei ak jingpyndon kam bakla ia ka bor la kynnoh u Semford B Sangma u nongialam ka NPP ha ka jingujr kaba la ai sha u Pravin Bakshi.
Ha kane ka jingujor u Semford u la ai lang ruh ia ka receipt kaba la siew T.50 lak da ka seng congress sha ka Pawan Han ha ka jingpyndon kam ia ka helicopter na ka bynta arsngi ha ka 25 bad 26 tarik u Lber.(SP News)