Jowai, Naitung 23: Ka AJYWO Central Body ka dawa na ka sorkar jylla ban pynsted noh ia ka jingpyntreikam ia ki jaka rung bad jaka mih ha baroh kawei ka jylla bad ruh ia ka Meghalaya Residents safety and Security Bill-2016 khnang ba yn lah ban tehlakam ia ka jingwanrung-jingwanmih kyrthlep ki nongwei shapoh u pud u sam jong ka ka jylla ka la buh ia ki trai ri trai muluk rit paid ha ka jingma na ki ba kum kine ki Jaidbynriew bad ruh khamtam eh ban tehlakam ia ka jinglah jong ki riew pyntriem ba shyrkhei jong ka pyrthei kum ki jong ka ISIS bad kiwei kiwei de ban ioh bsuh khlieh hapoh u pud u sam jong ka jylla.
“Ka jingjia ba dang shen ha Bangladesh bad ruh ka jingiohkem ki BSF ia ki katto katne ki briew kiba kam na shilliang pud, na Bangladesh sha India. la dei ban pynkyndit bynriew ia ka sorkar jylla ba ka dei ban sdang noh ban trei kam mynta ha ka jingiadei bad ka jingpyrkhing ia ka rung ka mih jong ki nongwei da ka pynkloi ban tei noh ia ki jaka rung bad jaka mih ha ka jylla bad ruh ban pynkhreh bad pyntrei kam noh ia ka Residents Bills khnang ba yn lah ban peit ngor ia ka bha ka miat bad ruh ka shongsuk shongsaiñ ha ka jylla hi baroh kawei. Kane ka long kaba donkam tam ia ka jylla ban leh shwa ba ka por kan dier noh.” ong u Bah M H Dkhar, President jong ka AJYWO Central Body.
“Ka long kaei kaei kaba pynlyngngoh ba balei ka shim por ia ka sorkar jylla da ki snem ki snem ban pyntreikam ia kita ki aiñ ba pyrkhing mynder la ong ba katkum ka tei iaki Entry bad Exit Points bad ruh ia ka Residents Bills bad kiwei kiwei de kat ba la rai ha ki jingialang ba lah pynlong la bun bun sien bha naduh ka quarter ba nyngkong jong u snem 2014 ia kaba la shongknor da u Chief Minister hi u Dr. Mukul Sangma ha kaba wad ia ki lad ki lynti na ka bynta ban tehlakam ia ka rung ka mih beaiñ jong ki nongwei ha ka jylla bad ruh na ka bynta ka shongsuk shnong saiñ jong ka jylla hi baroh kawei” la ong shuh shuh u Bah Dkhar.
Ka AJYWO ka dawa na ka sorkar jylla ba ka sorkar kam dang dei shuh ban dang buhteng ioh kan salong dier por noh hynrei ka dei ban pynkloi katba lah ban pyndep ia la ki jingkular jong ka ia ki 13 seng na ka bynta ka bha ka miat jong ki trai ri trai muluk jong ka jylla bad ruh na ka bynta ka shongsuk shongsain hapoh jong ka jylla, la pynkut u Bah Dkhar.
