Shillong, Jylliew 16: Ki lai tylli ki seng bahlang, kaba kynthup ia ka FKJGP, ka HYNF bad ka RBYF kila pynlong ia ka jingiakyn duhlang ha ophis trei kam jong ka seng FKJGP mynta ka jan miet ha Mawlai, ha dien ka jingiakren kila poi ban shim ia ka rai ban pynlong da ka jingiakhih shong kyllain mungor ha jan Additional Secretariat ha ka 21 tarik mynta u bnai kaba dei ka sngi Balang jong ka taiew ban wan ban pynbor ia ka sorkar ba ka dei ban sngeh shuwa ia ka jingshna ia ka lynti rel.
Haba kren ha ki nongthoh khubor, u president jong ka seng FKJGP u Bah W. Rani, ha kaba la don lang u Bah S Blah president ka HNYF, u president jong ka RBYF u Bah B Thangkhiew, u la ong ba na ka liang jong ki ki ieng ban pyrshah ia kane ka jingwan ka lynti rel sha Byrni bad ban pynpoi sha Sohra. Ha kane ka jingiakynduh lang jong kine ki lai seng mynta ka sngi kila shim ia ka rai ba ki kwah ban ia kynduh ia ka sorkar bad ka phang ba kin ia kren ka long ban dawa na ka sorkar ba dei ban ban pynsngeh shuwa ia ka jingtrei ia ka lynti rel.
Ban pynbor ia ka sorkar ba dei ban pynsngeh noh shuwa ia ka jingtrei ia ka lynti rel, na ka liang jong ki seng bhalang kila shim ia ka rai ba kin pynlong ia ka jingiakhih ka jong ki da kaba shong kyllain mungor ha ka 21 tarik mynta u bnai ha syndah jong ka Additional Secretariat, kane ka long ba kin pynbor ia ka sorkar ba ka dei ban sangeh shuwa ia kane ka jingshna ia ka lynti rel katba ki jingiada kim pat pynbiang.
Na ka liang jong u nongialam ka FKJGP, u la ong ba la pass ia ka ain hynrei ban shna ia ki rule haduh mynta ym pat lah leh ei ei naduh u snem 2013 hynrei haduh mynta ym pat lah ban leh, haba ia dei bad ki jaka ban shna ia ki jaka rung jaka mih jong ki briew la dep ban leit peit hynrei ka sorkar kam pat shim ia ki haduh kine ki sngi.
