Shillong, Rymphang 06: U Deputy Commissioner jong ka East Jaintia Hills District u A. Baranwal, IAS mynta ka sngi u la pynjari ia ka kyndon 144 CrPC ha khappud bad ka Bangladesh 5 km na khappud sha poh India, kane ka kyndon kan trei kam naduh ka por 6.00 baje jam miet haduh 5 baje mynstep.
Ha kane ka hukum kaba la pynmih mynta ka sngi la ong ba ka dei ka kamram jong ki BSF ban pahara khappud ban ia khun pyrshah ia ki kam beain ha khappud India bad ka Bangladesh, na ka liang jong u AOR jong ki shipai BSF ba dei jong ka 172 battalion la ong ba katei ka jaka ka jyllei bha ki kam khaii beain.
Ki jingia khaii beain ki long kum u Biri, ktung, Kwai, Tympew, Sigarettes, ki Masi, Muid, jain saree bad kaba kham sniew ka long ba ka don ka jingsuba ba ki nongialeh pyrshah ri kum ki lehnoh, ki Rohingyas ki wan ban rung na katei ka thain sha India bad ban rung sha Bangladesh.
Halor kitei ki jingtip kiba la ioh na ka liang jong u Deputy Commissioner jong ka East Jiantia Hills District katkum ka bor kaba la pynkup ha u la pynjari iaka kyndon 144 CrPC ha shilynter ka khappud bad ka Bangladesh kaba hap hapoh jong katei ka District.
La pynkynmaw ba dang shen kala don ka jingshah pyniap dusmon jong kawei ka longkmie ha katei ka thain Umkiang da ki khar Bangladesh bad mynta ka don ka jingiakhaii beain ha katei ka jaka kumba na ka daw jong ka jingkyrkieh ka kam la khang pyrshah ia ka jingiaid ki briew hapoh ka 5 km na khppud sha poh India naduh ka por 6.00 baje jan miet haduh 5.00 baje mynstep.
