Shillong, Rymphang 07: Ka tnad ba dei peit ia ki marpoh khyndew kala pynkynriah ia ki ophisar ka DMR na ka Weighbridge kaba don ha Amsarin sha kawei ka Weighbridge kaba thymmai kaba don ha shnong Sohkha ha ka surok Amlarem sha Dawki.
Katkum ki khubor kiba la ioh da u SP News Agency la iathuh ba ia ki ophisar ka DMR kiba juh don ban peit ia ka thew ka woh ia u dewiong bad u Mawshun ban shallan sha Bangladesh hapoh ka Weighbridge kaba ha Amsarin la pynkynriah lut sha ka Weighbridge kaba thymmai ha ka 2/2/2024.
Kaba la pynlyngoh ia ki nongkhaii bar ri, kiba shllan mar sha Bangladesh ka long ba na ka kaja Amsarin sha Tamabil kaba jngai tang kumba 9 km ki don lai tylli ki weighbridge, kawei ha Amsarin, kawei ha Sohkha kine baroh ar tylli ki dei jong ka sorkar jylla bad kaba ki Customs ki pdiang dei tang ia ka Weighbridge jong ka Port Authority of India kaba don ha Tamabile.
Kaba pynlyngoh ka long ba kumno ka tnad ka thew ka who jong ka sorkar jylla kala shah ban shna ar tylli ki jaka thew ne ki Weighbridge ha ka juh ka surok, Amlarem sha Tamabil bad ban thew ia ki juh ki mar ha ka juh ka surok bad kine ki jingthew kin don jingmut namar ba ka Customs ki pdiang ka jingthew jong ka sorkar pdeng ka Port Authority ban shah ia ki kali ban rung sha Bangladesh.
Kaba pynlynghoh shuh shuh ia ki nongkhaii bar ri ka long ba ka jingjngai ha pdeng ka Weighbridge na Amsarin sha ka Weighbridge ha Sohkha ka don tang hapdeng shiteng kilometer bad na Amsarin sha Tamabil ka don 9 km kin don haduh lai tylli ki weighbridge.
