Shillong, Nohprah 30: Ki nonglute kiba la suba ba ki dei kiba la wan kiew na Bangladesh kila thmu ban lute ia ka shnong Khonjoy, kaba don hapoh Jong ka South West Khasi Hills District ha ka miet sngi thohdieng.
Haba kine ki nonglute kila rung hapoh shnong bad pyrshang ban lute ia kawei ka long iing, ki trai iing kila pyrta bad ha kane ka jingpyrta la ia mih da u shnong ban ia beh ia kine ki nonglute, hynrei kine ki nonglute kila synreit kuli ia ki paidbah bad ha kane ka jingjia u wei u khynnah samla u la khlad noh ha shen na ka jingdei u kuli.
Na ka liang jong ki paidbah kila pyntip sha ki bor pulit ha kaba ia dei bad kane ka jingjia bad ki pulit kiba dei na Nonghyllam Police Station kila bet wut wut sha katei ka jaka ban thewt ia kine ki nonglute, hynrei na ka liang jong kine ki nonglute kila phet bak ha dien ba kila synreit kuli ia ki paidbah.
Na ka liang jong ki briew katei ka thain ki suba jur ba kine ki nonglute kila kiew na Bangladesh sha katei ka shnong bad ha dien ba kila leh ia kane ka kam runar kila ioh ban phet biang sha Bangladesh. Ka jingsuk jong ki nonglute ban kiew sha kine ki shnong ka long namar ba ia ka khadppud bad ka Bangladesh ha katei ka thain haduh mynta ym pat dep ban ker ksianar shniah.
