Shillong, Jymmang 22: Ki shipai BSF kila beh ban kem ia ar ngut ki briew kiba la wanrung na Bangladesh sha India ha kane ka jingiabeh, kine ki briew kila bret ia ka pla pisa kaba ki kit tang ban lait na ka kti jong ki shipai bad ioh phet biang sha Bangladesh. Kane ka jingjia kala jia hapoh Pyrdiwah.
Haba ki shipai BSF kila tam ia kane ka pla la lap ba ka don ka pisa Bangla T.1,44,000 Taka bad ka Pisa India T.32,000 tyngka. La ioh ruh kawei ka mobile phone bad ar tylli ki sim kard jong ka Bangladesh. Ki BSF ki shim ba kane ka pisa ka long ban wan siew ia ka bai masi.
Ha kawei pat ka jingjia ki BSF kila ioh ban kem ia u Nimai Mirandi u ba dei na ka shnong Dobakla bad 19 tylli ki masi katba u dang mut ban rung na India sha Bangladesh. Ka dor jong kine ki 19 tylli ki masi kala kot sha ka lai lak tyngka.
Ha kine ki ar sngi ki shipai BSF kila ioh ban kem haduh 69 tylli ki masi tang na South Garo Hills District. Na ka liang jong ki BSF kila dang pynjur ia ka jingpahara ha khappud bad ka Bangladesh ban teh la kam ia kine ki kam khaii beain.
